Da wai yaka Wahiajer Multi Sports Complex kawa da chna hei lut wa Rs. 60 klur

Ynne ka sngi u Montri Rangbah ka jylla, u Conrad Sangma da wan wai u yaka Wahiajer Multi Sports Complex kawa em ha Wahiajer, hei emlang ki ar ngut ki Symbood Montri Rangbah ka jylla u Prestone Tynsong wa u Sniawbhalang Dhar.

Da emlang leh u Chief Secretary ka jylla, u DP Wahlang, u Montri ka chnat Sports & Youth Affairs, u Shakliar Warjri, u Montri ka chnat Cooperation, u Comingone Ymbon wa kiwi ki MLA kamjooh ki MDC.

U Shakliar Warjri da ong u wa ka sorkar angnood ko wow pynmih ya ki khloor yalehke napoh ka jylla ha ka ri wei u tam ko leh hapoh ka thaaiñ mihsngi.

U Sniawbhalang Dhar hawa e yei klam da ong u wa nei kreh chitom ka sorkar da ye u pynman sakhiat ya kani ka madan kawa chongdor hadooh Rs. 60 klur wei da yoh yarap poisa na ka State Plan Scheme wa naka SAI.

Heiyatoh waka lympung yalehke kawa tip kam ka 3rd Sniawbhalang Football Stadium kawa da pynkut ha kani ka sngi, da pyntip wa da chah du ya kiwa na ka Nartiang Constituency wei em 1,830 ngut kiwa yalehke na ki 61 tylli ki chnong wei da leh yeini toh khnang wow pynchlur ya ki khynroo ka thaaiñ ha i yalehbol.

U Prestone Tynsong da ong u wa kani ka Stadium yaryngkat ko wa ka Stadium wa em ha Shillong wa Tura, wei sñiawkmen u wow yoo wa yoh i kaam pynroi ha kylleiñ ka jylla neipor cheipor.

Chooh chooh heiyatoh wa kiwa beiñ ya ka sorkar wa hiar ki kaam pynroi, u Prestone da ong u kyruiñ cha waroh ki Constituency haka jylla daw yoo ya ki kaam pynroi wa yoh ki.

Kam u kongsan ha kani ka sngi, u Conrad K Sangma da e khublei u ya u Blai wa da yoh ya kani ka sngi ka wow sahkynmoo wow wai ya kani ka Complex deiwa kynmoo ya i por wa wan u cha ini i thaw heiwa u Sniawbhalang da pynyoo u ya i thaw wa angnood u wow chna ya ka madan ha ini i thaw.

Da ong u wa ha ki san snem wa da lai da e chiboon ka poisa wow pynku ya ki kaam yaleh Sports wei daw pteiñ leh yeini ha ki snem wow wan.

Chooh chooh da khana u ya ki kaam pynroi wa har rukom wa da ye u wanrah ha kylleiñ ki District ka jylla.

Da khana u leh wa ha u snem wow wan daw pynman ya ka Meghalaya Games ha Jaiñtia Hills ha u Duyatra (Jan) wei daw man ko ka lympung yalehke wa heh dooh haka jylla wei daw kreh chitom hapoh chi snem wow pynbiang yeiwa emkaam neibynta ini.

Kani ka Complex toh kawa em yaka madanbol (Artificial Turf) waka thaw phet namo ka Synthetic Athletic Track wei ki paidbah wa chniam ha kani ka madan toh 4300 ngut.

Ha kani ka sngi da yoh leh ya i rwai wa i Chaad Pliang na ki khon ka chnong Wahiajer.