Ka Behdieñkhlam yong ka Seiñ Raij Mukhla ynne ka sngi Mulong dapoi ko cha ka sngi wa ar heiwa ki khon ka Seiñ Raij Mukhla dang step da mih ki na yung na sem wow lai cha khloo yow lai pam ya ki ar tylli ki dieñkhlam ki wow pynyieñ uwi ha madan tih kyndaw ha Wahchnong wei uwi won ha madan Ryngkaw ha Slot Masi.
Hadien wa da dep wow pam ya kini ki dieñkhlam, heipor 01:00 waje i sngi ki khon ka Seiñ Raij Mukhla hapoh i yahkhmat u Pa Langdoh Niam wa ki Waheh Sankur da ya lai ki wow rah ya kini ki ar tylli ki dieñkhlam wei ya kini ki dieñkhlam da booh ya ki ha madan yow pynyieñ mynstep ka sngi, ha kani ka sngi lai rah dieñkhlam da embynta lang wa u Wailadmiki Shylla, MLA.
Hadien wa wanrah ya kini ki artylli ki dieñkhlam da yoh biang wow ya chong dorbar niam wow ya pyrkhat ya ki kaam niam kiwa ki khon ki hajar ka Seiñ Raij Mukhla wa hap u pyndep ki mynstep ka sngi Musiang kawa man ka sngi wa le yong kani ka lehniam Behdieñkhlam, wei ya kani ka Dorbar Niam da pynlai ya ka da u Pa Langdoh Niam ka Seiñ Raij Mukhla, u Wanbha Lyngdoh.
