U Montri ka chnat i chait i khiah, u Wailadmiki Shylla ynne da pynche u yei rukom yabhah ya kiwa lai puræ MBBS na ka bhah ka jylla namo ka State Quota deiwa ong wa da leh yeini katkam ka Standard Operating Procedure (SOP).
Hawa jubab yei pynbaad wa leh chiliang, u Wailad hawa yaklam wa kiwa thoh khubor da ong u wa da em i sñiawkhia iwa da pynsñiaw da ka KSU wa JSU, tangwa ya iwa boon toh iwa da ye u pynbait.
U Montri da batai u wa kiwa yoh boon Marks na ka thup yong ki Khasi-Jaiñtia da jied ki wow neh hapoh ka bhah kawa da booh kyrpang (Reserved Category) hanla ye ki wow chah jied yow psiah hapoh ka Unreserved Category tangwa hadien wa da pynsñiaw yei sñiawkhia, kini kiwa em hakhmat da pynsñiaw ki wa smat ki wow chim yow psiah noh hapoh ka Unreserved Category.
Da pyntip u leh wa hadien ka yalang da chim ya ka rai wow pynkrehkaam ya ini wa da kyrpaad kiwa lai puræ.
U Wailad da pynche u leh wa kawa yoh Topper na ka Reserved Category ki Khasi Jaintia, hei yong sakhiat toh u lai psiah ko cha ka Unreserved Category neibhah ki Marks yong ka rap heh ki ya kiwi. Tangwa ka SOP da klam che ko wa chnong ha kini kiwa yoh u lai puræ wow jied da kawon kwah ki neibhah ye ki wow jied kawi. Kamtæ nyngkong da jied ko ya ka bhah ki Khasi-Jaintia, wei da pynbna leh yei pyrtuid katkam wa da jied ki. Hadien hawa ki seiñbhalang da pynsñiaw ki yei sñiawkhia, da Phone won kani ka kynthai deiwa ong wa smat ko wow psiah noh hapoh ka Unreserved Category.
“Ynne ka sngi da khut ka yalang ya waroh heiwa ka chnat leh ym em eh ya ka wow pynbait yeini katkam wa kwah kiwa lai puræ,” da pyntip u Wailad.
Discussion about this post