Ka sorkar Meghalaya dang yang ko yei mynjur na ka Coal Ministry yow sdang noh yei tih mooyong katkam ka juk wa katni kawa tip leh kam ka Scientific Mining hapoh ka jylla.
U Montri Rangbah ka jylla, u Conrad K. Sangma da pyntip u wa ki Public Hearing neibynta wow leh ya ka Scientific Coal Mining ha ki le tylli ki thaw da pyndep ar bnai nachwa wei hadien ini da yoh bor (Clearance) na ka Forest and Environment Department kamjooh na ka Pollution Board. Wei ya waroh kini ki kot ki sla da phah cha Delhi, kattu won ka Coal Ministry daw pait ko ya ini waroh yow e bor yow sdang noh u tih.
U Conrad da ong u wa waroh ini toh iwa kyllaiñ bha neibhah wa hap wow bood ya waroh ki kyndon ka NGT deilang ka Supreme Court.
Chooh chooh da ong u wa i rukom mantre yei khyndaw u chyiap deilang ki aiñ ka jylla man ki kiwa rap phær iwa da pynkyllaiñ chooh chooh yei kaam, wei lada kwah won wow tih ya ki paar mooyong kiwa rap khian daw emkaam da ki kor kiwa da chna kyrpang wei kini leh hap wow kdaw wow booh kyndon da ka sorkar India.
Da pynche u leh wa ki paar mooyong ha Meghalaya phær bha ki na kiwi won ki bynta ka ri iwa da man sa iwi i daw wa da chimtom wow leh ya ka Scientific Mining.
Hawa jubab yeiwa chah kynthah ha ka liang pyrchah yei daw wa pynslem, u Conrad da ong u wa kitu kiwa em cha lait suk hi-eh ki wow klam neibhah wym sñiawthooh katwon kyllaiñ wei hadooh katwon tylli ki chnat wa embyntalang nadooh ka sorkar India, ka NGT, ka Coal India, ki chnat wa pait ya ka ramaw wei manda ye u leh waroh ini, ki bru daw sdang ki wow sñiawthooh wei sñiawngooh hadooh katwon hap wow kreh chitom.
Da ong u leh wa deiwa yoh kattæ waroh ki kot ki sla wa emkaam, dang yang sa du yei mynjur ka Coal Ministry iwa da yooluti wym slem de.
Discussion about this post