Shillong: U Director of Health Services (MI), u Dr. Aman War da ong u wa ka Lockdown ha nongbah Shillong da yarap ko yaka chnat i chait i khiah wow booddien ya kiwa ye wow em hei maa nei yabi u khñiang COVID-19, wei ha kini ki 2 sngi wa da dep, ka chnat da ye ko wow booddien kamwa 1000 ngut ki bru wa yajan wa kiwa em ya u COVID-19.
Da em leh i pynsñiaw na ki kattu katni ngut kiwa chong chnong wa emkaam yaka sorkar wow pteiñ chooh yaka Lockdown neibynta wow kdoh u khoom yei poor smat i poor ka khlam COVID-19. Tangwa hawa kylli, u Dr. Aman War da ong u wa ka chnat i chait i khiah daw pyrkhat biang ko ya ini mynstep ka sngi, wei daw rah ko yei e yumut cha ka sorkar, deiwa pynsñiaw leh wa kamwa man kattæ, ka Lockdown da yarap bha ko wow booddien wei wow yada nei poor u COVID-19.
U DHS kubur u leh wa ka jylla slem ko heiyatoh wow leh ya ki Test, tangwa da pyntip u wa da yaklam waka Council of Scientific and Industrial Research (CSIR), Jorhat kwaw em katni 8 tylli ki kor Test RT-PCR wei ye ko wow Test 3000 tylli ki Sample haka chi sngi. Da pyntip u wa neiliang u Director ka CSIR da kular u wow yarap Test 300 tylli ki Sample neibynta ka jylla Meghalaya ha ka chi sngi.
U Dr. War da pyntip u leh wa neiliang ka sorkar jylla daw pynkhlan chooh chooh leh ya ka thaw Test ya ki Sample ha Pasteur Institute kawa em ha Lawmali, Shillong.
