15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Em ar chah yeiwa emkaam bru wakreh ha JHADC

Advertisement ad1
Advertisement ad1

Jowai: Ynne ka sngi man ko ka sngi kawa sahkynmoo ha ka parom yong ka Jaiñtia Hills Autonomous District Council (JHADC) heiwa ha ka Dorbar L’yur wa da pynman ynne ka sngi da yaklam hadooh kamwa 2:00 kynta hajrong ka Resolution wa wanrah da u CEM ka Council, u Thombor Shiwat heiyatoh wa i thung kreh hapoh ka Council.

Katkam wa man katni hapoh ka Council da em hadooh 1807 ngut ki wakreh wei katkam ka bui (Report) da chem wa ki wakreh katni wa i emkaam ka Council da yaphær i bak la bak neibhah wa da chem wa i emkaam bru wakreh ka Council toh du kamwa 900 tam donhi, iwa mut ki wakreh da man ki ar chah bar yei bor wa emkaam ka Council.

Hawa wanrah ya kani ka Resolution ynne ka sngi, neiliang u Thombor da ong u wa katkam ki kyndon ka JHADC Service Rules 1981, waroh ki wakreh (Total Approved Strength) ha ki kyrdan waphær waphær ki chnat hapoh ka Council chirup wa ki kyndon hapoh ka Appendices II and III ka Service Rules wa ka Rule 9 wei katkam ka mang poisa (Budget) yong u Financial Year 2020-21 toh 1480 tylli ki kreh (Post).

Da ong u leh wa i pynemkaam bakla ya ka Rule 9 da wanrah i yei thung kreh wei i em palat ki bru wakreh hapoh ka Council iwa da man ka lyngkor kawa khia ya ka Council khamatam heiyatoh wow su ya ka tulop. Da pynrap u leh wa i pynemkaam bakla ya ka Rule 9 da man i iwa bakla iwa da yah leh chei thung kreh jhan deiwa lai-lait ya ki kyndon ka aiñ thung kreh.

U Thombor da pynrap u leh wa i thung kreh deiwa pynemkaam ya ki kyndon ka Rule 9 toh neibynta ki kyrdan kreh Class III wa IV.

Katkam wa man hi, ki kyrdan kreh kiwa da thung kreh kiwa palat yeiwa emkaam (Required Strength) wei kamjooh kiwa ym emkaam (Not Required) kynthup ki ya ka kyrdan LDA, LDA Cum Typist, Receptionist, Duftry, Driver, Recorder, Fieldman, Cleaner, Office Peon, Forester, Assistant Forester, Forest Guard, JE Grade II. JE Grade III, Sweeper, ASi, wa kiwi kiwi.

Ki kattu katni ki chnat ka Council kiwa da tam boon da ki wakreh bar yeiwa emkaam man ki kamni hawah:

Ha ka chnat General Administration Department da thung 28 ngut kiwa yah kari (Driver) iwa tam 14 ngut neiwa emkaam.

Ha ka Land Revenue and Land Reform Department da thung 54 ngut katwa emkaam won du 25 ngut, da thung leh hadooh 45 ngut ki Fieldman katwa emkaam won du 10 ngut,

Ha ka Land Record and Land Settlement Department da thung 40 ngut ki Recorder katwa emkaam won du 5 ngut.

Ha ka Forest Department da thung 44 ngut ki Forester katwa emkaam won du 22 ngut, ki Forest Guard da thung 61 ngut katwa emkaam du 20 ngut.

Ha ka chnat Education da thung 323 ngut kiwa sikai katwa emkaam won du 154 ngut cha ki skur DCLP School, Govt. School wa Private School.

Da em ki kreh ha ki chnat ka Council ha kiwa da thung kreh tangwa ym emkaam ya kini ki kreh hapoh kini ki chnat wei kam ka nongmuna ha ka Land Record & Land Settlement Department da thung hadooh 30 ngut ki Fieldman katwa ym emkaam ya ini i kreh ha kani ka chnat, ha ka Civil Works Department da thung 6 ngut ki Sweeper katwa ym emkaam ya kini ki kreh, wa kiwi kiwi.

Kamtæ neiliang u Thombor da wanrah u ya kani ka Resolution khnang wow pynstiñ ya kani ka lyngkor ka Council, heiwa da tyrwa wow dam noh chwa u thung kreh neini chaphrang hapoh ka Council kat hadooh wa da ye u pynduna ya ki wakreh kat dang lai ki snem katkam i bor wa emkaam ka Council.

Ini i tyrwa ya kani ka Resolution ym em man i iwa da ye u pdiang da ki kattu katni ngut ki MDC khamtam na ka liang pyrchah heiwa neiliang u Lakhon Biam da pyrchah joor u yeini i thmu neibhah wa daw sangeh noh wow thung bru ha ka Council wei ini daw ktah ko ya ki khynroo khyllood kiwa da em i stat kiwa ym em khih em kreh napoh ka Ri-loom Jaiñtia.

U Lakhon da ong u wa katni emkaam wow thoohlaad kammon wow wai laad ya ki wow yoh khih yoh kreh ki tangwa heini won da rai wow sangeh u dam noh u thung kreh, man i iwa ymye u pdiang.

U Dawan Lyngdoh da ong u wa i sangeh thung kreh ka Council daw ktah i ya ki paidbah deiwa e nongmuna wa em boon ki bru kiwa yaleh ya ki kot thaw namo ki Land Holding tangwa neidaw wa duna ki wakreh da slem u dep ini i kaam yong ki iwa da sahteiñ da ki snem kattu katwa kamtæ lada sangeh u thung kreh daw pynslem chooh i ya ki kaam ki paidbah. Heijooh i por da e nongmuna u leh wa da em ki ujor wa da booh ha ka Council wa em kiwa kyntoor pood chapoh ki khloo ka Council tangwa hadooh katni ympu em wa wan leh sorjamin ya kini ki khloo.

U Andrew Shullai da ong u wa neipor cheipor da wanrah ya kani ka phang ha ka Council tangwa ymjooh pdiang ya ka tangwa kmen u wa da bien ka Executive Committee wa ki sahep wow chimkhia ya ini i kaam deiwa tyrwa leh wa dang emkaam wow pynjanai ya kani ka Resolution. Da pynrap u leh wa deiwa leh kamni daw ktah ko leh ya ka pynku kyrdan (Promotion) ki wakreh neini mynried ha ki snem wow wan neibhah daw em i yaknieh hapyrdi ki wakreh kiwa kwah wow yoh ku kyrdan.

Neiliang won u Krison Langstang da pyrchah u ya kani ka Resolution deiwa ong wa kammon u leh ka Council mynried lada emkaam ko wow thung bru da kiwa chemphang ha ki bynta waphær waphær kam ki muktiar wa kiwi kiwi.

Hajrong kini waroh neiliang u Thombor da pynche u wa ya kani ka Resolution da wanrah da ka EC neibynta i bha i miat ka Council wei khnang wow ye u pyndap yeiwa emkaam su tulop ya ki wakreh.

U CEM da pynrap u leh deiwa ong wa ya kani ka Resolution ye won wow pynkylla ya ka mynried lada sñiaw emkaam ki EC wow wan wow leh kamtæ.

Khaddooh ka Dorbar da rai ko wow pdiang ya kani ka Resolution wow sangeh noh chwa wow thung kreh thymme hapoh ka Council ha ki kyrdan waphær waphær yong ki chnat ka Council.

Share this:
Previous

33 ngut ki bru paidbah wa dang yoh COVID-19 na ki 41 ngut ha Meghalaya

Next

Da ye wow booddien ya kamwa 1000 ngut kiwa yajan wa kiwa yoh COVID-19 nadooh wa sdang yaka Lockdown