Kiwa lai puræ Undergraduate kiwa kwah wow chim ya ka NCC kam ka Subject da ye ki kattu deiwa tipmit wei pynpsiah ya ka NCC kam ka Elective Subject hapoh ki Under Graduate Course ha waroh ki College wa em hapoh ka NEHU, heiwa ya ini da pyndep rukom ynne ka sngi da u Lat ka jylla u Satya Pal Malik ha ka yalang wa pynman ha Raj Bhavan, Shillong.
Hawa e yei klam, u Lat da ong u wa ini i tipmit ya ka NCC kam ka Elective Subject ha ka kyrdan puræ Undergraduate toh iwa bha iwa daw pynmyntoi ya kiwa lai puræ neibhah man ko leh kam ka “Scoring Subject” iwa mut wa daw yoh Marks na ka leh.
I yoh sikai kam ki dkhot ka NCC namo ki Cadet toh iwa da neh waroh chi rta wei yarap ko leh wow pynwandur yei rukom im ha waroh i liang, da ong chooh chooh u Lat. Da ong u leh wa oo da poi u cha iwa man u katni deiwa yoh yurim u na i e sikai heipor wa man u kam u NCC, kamtæ da yaroh u ya ka NCC waka NEHU yei wanrah ki ya ka NCC kam ka Subject wa thymme kawa daw pynmyntoi bha ya ki khynnah.
Kiwi de kiwa klam ha kani ka sngi toh u Major General Ananta Bhuyan (Sena Medal) Additional DG, NCC, North East Directorate wa u Vice Chancellor ka NEHU, u Prof. Sri Krishna Srivastava.
