Uwi na ki 7 ngut ki koidi wa dang chah bichaar namo ki Under Trial Prisoner (UTP) kiwa da yoh wow yut na Pasighat Jail, East Siang, Arunachal Pradesh deiwa briat sumurit ha ki khmat ki pulit da yoh kem biang ya oo na chnong Mirbuk da ki pulit ynnin i miet heipor 11:30.
Uni uwa yoh kem toh uwa tip kam u Kalen Apang (33 snem) uwa da emkti ha ki kaam slaitbor, da kem ya oo deiwa yarap kiwa chong chnong ka Mirbuk.
Uni u koidi da psiah u ha iwi i yung wa em ha Mirbuk iwa em hajan i chnong Pasighat heiwa da chem ya oo heipor wa baam ja u ha i yung chet-ja iwi i yung khlem da tip ki tre. Heiwa da yoo ya oo da u khynnah wa 15 snem i rta.
Neiliang kiwa chong chnong da pyntip ki cha ki pulit kiwa da wan heiwa da chem ki wa da kær kut ki paidbah ya ini i yung.
U khynnah uwa em samen ha yung da khana u wa nyngkong da sñiaw u yei chang u ksaw dep neitæ sñiaw u yei kieh ki kchu ki plang ha yung chet-ja wei manda pait siar u da yoo u ya uni u bru heiwa da lai pyntip u cha kiwa jan yung.
Ki pulit da pyntip ki wa u da em ki warep wa da yoo sa ya uwi na kini ki koidi hajan i chnong Magnang heipor kamwa 4 waje i step heiwa da yut u cheiliang ka Poba Reserve Forest kawa em hajan u pood wa ka Assam.
Puræ leh: Lait yut 7 ngut ki koidi deiwa brait sumurit hei khmat ki pulit ha Arunachal
