Ynne ka 28 tarik da pynman ya i pynsñiawthooh hajrong ka phang wa emkaam wow chim tika ha ka chnong Madankynsaw-Mowkyndeng wei ya ini da pynman da ka yung krehkaam u BDO, Laskein Block chirup wa u Medical & Health Officer, Laskein CHC.
Kiwa emlang ha kani ka sngi kynthup ki ya u waheh chnong ka Madankynsaw u Danny Shadap wei da pynlai ya ka yalang da u Dr. E. Lytan, uwa man u Medical & Health Officer, Laskein CHC wei da pynche u leh cha kiwa kitkaam chnong kam ki Village Covid Management Committee, kiwa kitkam niam, Village Organization wa kiwi kiwi hajrong kani ka khlam.
Da pyntip leh wa ka chnong Madankynsaw man ko kawi na ki chnong ha Laskein Block kawa da kynjoh cha ka 97% wa da dep chim tika ya kiwa palat 45 snem wei man ko leh kawi na ki chnong wa kiwa dadap 18 snem hadooh 44 snem da wan boon dooh kiwa wan chim tika.
Neiliang u waheh chnong ka Madankynsaw, u Danny Shadap da e khublei u ya ki Doctor wa kiwa kreh ha i chait i khiah wa ka yung krehkaam u BDO ka Laskein wa da chimkhia ki neibynta i chait i tram ki bru heiyatoh wow yada na u COVID-19.
Da e khublei u leh ya kiwa kitkaam ka chnong Madankynsaw neibynta wow yada na u COVID-19 heiwa da ye u pyntikna wa waroh kiwa chong dukan wa kiwa kamai kari ha chnong Madankynsaw dadep ki wow chim tika wei da kyrmen u leh ha kini ki sngi wow wan daw ye u pyndep 100 % ya kiwa da palat 18 snem.
Neiliang u Dr. B.S. Langbang hei klam yong oo da yaroh u ya kiwa kitkaam ka chnong Madankynsaw hei yahkhmat u Waheh Chnong wa da ye ki u leh boonjait ki kaam wow yada na i poor ka khlam COVID-19.
Da ong u leh wa ka chnong Madankynsaw u man ko kam ka nongmuna ya kiwi ki chnong kiwa em ha Laskein Block heiwa da wan ki paidbah chaphrang wow chimbynta wow yada na kani ka khlam deiwa chim ya ka tika.
