Uwa yahkhmat ka United Democratic Party (UDP), u Titos W Chyne, uwa man leh u MDC ka Sohra, da ong wa i yaklam neibynta wow pynku kyrdan District ya ka Sohra Civil Sub-Division dang pteiñ i.
Hadien wa u Montri Rangbah, u Conrad K Sangma ynne ka sngi da pynbna u wow e District ya ka Mairang hachwa ka sngi lehkmen yei laitlooid ka ri, itæ chwa ka 15 tarik u Naisaphra 2021, ha i por janmiet neiliang kiwa yahkhmat na Sohra kiwa da yakhun wow pynyoh ya ka District hapoh i yahkhmat u Titos wa u MLA ka Shella, u Balajied Kupar Synrem, da yachem ki ya u Montri Rangbah wow pynyoh ya ka Sohra da ka yong ka hi ka District.
U Titos da ong u wa i lai yaklam toh neidaw wa i dawa toh iwa da dep yaklam nadooh rap nachwa. Da ong u wa kam kiwa Mihkhmat ka Party da lai ki wow yaklam neibynta kani ka phang kawa kam ka Party hi da jooh yaklam ko, heiwa da ong u wa hanla u Montri Rangbah da pynbna u wow pynku kyrdan District ya ka Mairang Civil Sub-Division, ym kut i yaklam yong ki wei u pteiñ hi i.
Da pyntip u wa u Montri Rangbah ym pu em e u ya iwon iwon i kular tangwa dang pait bniah ya kiwa emkaam waroh kiwa hap wow wow pyndooh yeiwa thut u pynmankaam yei yooluti wow pynku kyrdan District ya ka Sohra, neibhah wa ki paidbah ka thaaiñ Sohra hi da kylli ki chaphang ka phang kawa yatoh wow pynku kyrdan District ya ka Sohra Civil Sub-Division (kawa da wai ha u snem 1982) wa mar ya bna yei e District ya ka Mairang, wei ki kam kiwa mihkhmat hap ki wow jubab ya ki paidbah.