U Mukhtar Ansari, uwa da jooh man kam u MLA san sien na Mau, Uttar Pradesh da khlaad noh u neidaw wa yoh Heart Attack hei janmiet ka 28 tarik uni u bnai, heiwa da phah takit leh yei daw wa yap u.
Uni u Politician uwa man leh kam u Gangster toh uwa da chah kset ha Banda District Jail, wei da pynkit ya oo cha Rani Durgavati Medical College hadien wa joor i chitom u manda pyndep u yei chah thngan Ramzan. Nyngkong da khut ya ki Doctor chapoh ka Jail yow sumaar oo tangwa da kit ya oo cha Hospital hadien wa da suba wa yoh Heart Attack u.
Dapoi u cha Hospital heipor 8:25 i miet heiwa ym em yong bru de u wei da khlaad noh u hadien kattu katni kynta.
Hajrong ini, da phah wow pynman da ka Magisterial Probe yow takit yeini wa jia hadien wa kiwa ha-yung u Mukhtar Ansari da pynbaad ki wa em wa leh yeini neibhah u pa ki da ong u wa em wa e bih yei baam u.
U Mukhtar Ansari toh uwa da chah kset nadooh u 2005 wei toh u bru wa em palat 60 tylli ki mukotduma pyrchah ya oo heiwa da kset ya oo ar snem ha Punjab wei da wanrah biang cha Banda Jail ha u Naitung (Apr) 2021.
Da chah rai pynrem u leh ha ki 8 tylli ki mukotduma ha u Naikhynde 2022 da kiwa boon ki yung bichaar ka UP wei da phah kset oo ha Banda Jail heiwa da emkti u leh hei chah siat yap u MLA ka BJP, u Krishnanand Rai.
U Ansari da mihlang u hei pyrtuid ki 66 ngut kiwi ki Gangster wa da pynmih da ka Uttar Pradesh Police ynnin u snem.
Neiliang kiwa ha-yung u MLA ka BJP, u Krishnanand Rai, da ong ki wa da yoh ki yei hok hawa kut heiwa u Blai da rai u yeini ha uni u bnai Ramzan, da ong u khon u Rai, u Pyush Rai.
Kam wow pynkynmoo wa ha u snem 2005, heipor wa u Krishnanand Rai dang liwan u cha yung hadien wa wai ya kawi ka Cricket Tournament da wan ki bru wa rah AK-47 kiwa da siat ya oo deilang wa ki 6 ngut kiwa emlang wa oo.
Heiyatoh wa ini, ha u Naitung (Apr) 2023, ka yung bichaar ka Ghazipur ha Uttar Pradesh da rai pynrem wei da phah kset ko ya u Ansari 10 snem heiyatoh wa i chah pynyap u Krishnanand Rai.
“I kmen bha i wa u Baba Gorakhnath da pynyoh u yei hok neibhah u Mukhtar Ansari wot heipor wa em u ha patok ha Punjab da phah leh u boon ki kaam pyrchah aiñ tangwa manda poi u cha Uttar Pradesh, da yoh u yei hok u. Uni u bru toh uwa sih bha wei kattu da kut i,” da ong u Piyush Rai.
Da beiñ u leh ya ka Samajwadi Party kawa da wyrai yei yap u Mukhtar Ansari kiwa kyrchaan ya kam uni u bru.
Ka kurim u Krishnanand Rai, ka Alka Rai da ong wa waroh kiwa da chitom hei kti u Ansari da yoh ki yei hok ki kattu.
Discussion about this post