Ka Director ka chnat Tourism, ka B.L. Pakyntein, ynne da pynche ko heiyatoh wa i sñiawkhia ka Joint Action Committee (JAC) yei thmu wow chna ya ka Ropeway Project ha Laban, deiwa ong wa ka chnat da yachem wei yaklam ko wa ki dkhot ka JAC khamtam heiyatoh wa i yakhih wa da mut ki wow pynman ha ka 17 tarik uni u bnai.
Da khana ko wa ha ka 15 tarik da yachem ka Commissioner and Secretary ka chnat, ka R.M. Kurbah deilang ki sahep na ki chnat wa boon yow pynche kammon da thmu wow pynkrehkaam ya kani ka Ropeway Project.
Da pynyoo leh cha ki dkhot ka JAC kammon wa da leh wa i yohbor wa da yoh yow sdang ya kani ka Project deiwa em leh ki Environmental Specialist kiwa da batai che yeini.
Neiliang ka Pakyntein da ong ko wa da yoh No Objection Certificate (NOC) na ka Dorbar Chnong wei da ya soi leh ya ka soskular (Lease Agreement) yow lai chakhmat wa kani ka Project.
Heiyatoh wa ka Public Hearing, da ong ko wa ka chnat da thoh ko cha waroh ki 7 ngut ki waheh chnong yow khut ya kiwa chong chnong wow chimbynta ki ha kani katkam ki kyndon wa toh u bood.
Da ong ko leh wa da khut Tender du hadien wa yoh ya ka NOC na ki waheh chnong wei u Contractor wa yoh ya ini i kreh leh da phah ya oo wow yaleh ya ka Trading License na ka Khasi Hills Autonomous District Council (KHADC).
Kani ka Trading License won da sahkut ko hadien wa pynsñiaw ka JAC yei pyrchah tangwa neiliang ka chnat Tourism da ong ko wa da leh waroh nadooh wow yaklam wa ki paidbah wei da yoh leh ki Clearance wa emkaam.
Da kyntait ko wa da leh ya ini i kaam khlem da yaklam chwa wa ki paidbah heiwa da pyntip cha ki wei man iwa bakla wow ong wa da leh yeini waroh deiwa murieh.
Hajrong ka Public Interest Litigation (PIL) wa da em wa yaleh, da pyntip wa ya kani leh da pynkut da ka Meghalaya High Court hadien wa pynyoo wa da yoh ya ka Environmental Clearance.
Hajrong ini waroh da ong wa neiliang ka chnat Tourism pdiang ko ya kiwon kiwon kiwa kwah wow yaklam wei kiwa kwah wow pynche heiyatoh wa kani ka Ropeway Project.
Discussion about this post