Ka Environment Coordination Committee Elaka Sutnga kawa da yaleh mukotduma ha ka NGT pyrchah ya ki Coke Factory, ha ka kyrwoh khubor wa da phah da pyntip ko wa hadien ka hukum wa da pynmih ha ka 11-03-22 heiwa ka NGT da e por ko ya ka MSPCB wow khana kammon da pynchitom ya ki 31 tylli ki Coke Factory yow su ki ya iwa da chah ktah ka rymaw kamjooh kiwa chong chnong, ka MSPCB ym ye ko wow leh yeini heiwa haka 11-05-22 ka NGT da e por ko sa ar tayaw wow leh yeini.
Ha ka 26-05-22, ka MSPCB da phah ko ya ka ki 31 tylli ki Coke Factory wow su ki ya ka bai chah ktah namo ka Environmental Compensation wei ya kani ka poisa toh u su chwa cha u Member Secretary ka MSPCB hapoh 15 sngi wei kani ka kuna wa da pynngat da em ko nadooh T. 10,000 hadooh T. 51 lak.
Ya kani ka mukotduma da chong bichaar biang ha ka 27 tarik uni u bnai heiyatoh won wa ki 14 tylli kiwa da yoh ya ka CTO namo da yoh bor wow krehkaam heiwa hadien wa sñiaw ya waroh ki liang, ka yung bichaar daw chong chwa ko chwa wow pynmih yei rai.
Neiliang ka ECC da phah chithi ko cha u Montri Rangbah ka jylla wa cha ka Chief Secretary yow pynmih hukum yow tympra noh ya waroh ki Coke Factory ki wym yoh bor wow sdang.
Kamtæ da ong wa kiwa chong chnong ka Elaka daw yang ki ya ka rai heiyatoh wa ki 14 tylli ki Coke Factory wei katkam wa sñiawthooh ka ECC kini leh ym toh u chah wow krehkaam ki neibhah em ki hapoh ki thaw wa sah ki bru wei yeini da pynsñiaw leh haka mukotduma pyrchah ya ka sorkar kawa kyrchaan ya kini ki 14 tylli.
Da ong leh wa katkam ka Article 21 ka Constitution waroh ki bru em ki ka hok wow riñ mynsien da ka la-ær wa khooid, kamtæ da yooluti wow yoh ya ka rai kawa biang.
Ka MSPCB ya ka Shree Jii Carbon kawa da sdang wow pynmadan yei thaw khlem da yoh bor da daiñ kuna T. 10,000 katwa ya ka M/s Meghalaya Minerals kawa da krehkaam bait hanla da phah khang leh da daiñ kuna T. 51,70,000 kiwa duna wa kiwa heh dooh ki kuna.
Puræ leh: Ka MSPCB da yoo lakam wa e por ko ya ki Coke Plant wow murieh yei pap ki: NGT
