theme-sticky-logo-alt
theme-logo-alt

Ka MSPCB da yoo lakam wa e por ko ya ki Coke Plant wow murieh yei pap ki: NGT

Ka mukotduma wa da leh da ka ECC Sutnga Elaka pyrchah ya ki Coke Plant da chong bichaar biang ya ka ynne ka sngi da ka NGT heiwa da yoh yei jubab naka Ministry of Environment, Forests and Climate Change wa naka Meghalaya State Pollution Board (MSPCB) heiwa ka MSPCB ym em jubab ko kamwa da phah ya ka heiyatoh wow kheiñ ya ka lutsan wa toh u su cha ki tre thaw kiwa chah ktah deiwa em kini ki karkhana.

Ka MSPCB hei jubab da paan por ko wow pynkhreh ya ki kyndon pynchitom ya kitu ki Coke Plant kiwa tyngkheiñ kyndon kam kiwa da sdang u chna khlem da yoh bor wa kiwa pteiñ u krehkaam hanla da yoh ki ya ka hukum wow khang namo ka Closure Notice. Da pyntip leh wa i kheiñ ya ka bai lutsan (Environmental Compensation) wa hap u su toh kawa dang pynkhreh.

Neiliang ka NGT da pynsñiaw ko yei chrai yei wym burom ya ka hukum wei da e por hadooh ka 22 tarik uni u Naisan wow jubab khamtam wa yatoh waka bai lutsan kamjooh yei lai sylli ya kiwa tyngkheiñ kyndon.

Lada ym ye u e yei jubab daw hap won dei bru u Member Secretary ka Board haka 27 tarik uni u bnai manda chong bichaar biang ya kani ka mukotduma.

Ka NGT da pynsñiaw ko leh yei phylla yei wym ye ka MSPCB wow lai sylli (Inspect) ya ka M/s Jaintia Coke Industries waka M/s Vivan Associate wei ym em khana leh mynnu u lai sylli biang ya kini ki karkhana.

Ka MSPCB da e daw ko leh wa ya kiwi ki 5 tylli ki Coke Plant ym em u lai Inspect ki neidaw wa ka ujor pyrchah ya ki toh wa tyngkheiñ ki ya ka Consent to Establish (CTE) ym toh wa tyngkheiñ ki ya ka Consent to Operate (CTO) heiwa da sdang ki du yei kreh wa khian kam i pynmadan yei thaw wa kiwi kiwi chwa wow yoh ya ka CTE. Hajrong ini, ka NGT da ong ko lada man kamtæ leh, ki Coke Plant kiwa da kreh khlem da yoh Environmental Clearance toh kiwa da tyngkheiñ ya waroh ki kyndon hapoh ka Water (Prevention & Control of Pollution) Act, 1976, ka Air (Prevention and Control of Pollution) Act, 1981 waka Environment (Protection) Act, 1986.

Kamtæ ka NGT da ong ko wa ini i rukom jubab ka MSPCB da yoo lakam wa e por ya kini kiwa tyngkheiñ kyndon wow murieh yei pap yong ki heiwa ym em tang wow lai leh yei Inspection heipor wa biang.

Ha iwi i liang, ka MSPCB hei jubab da pynyoo ko wa da em 4 tylli ki karkhana kiwa em hapoh 1 Km na ki thaw sah ki bru kiwa em ha Umpleng (Pther), Sutnga (M/s Meghalaya Coke), kawa em ha Soo Kilo (M/s Syrpailang Coke), kawa em ha Kya Shitang, 4 Kilo, Sutnga (M/s Jaintia Coke Industries) wa kawa em ha Dat Simpien Lad Rymbai (M/s Abhi Coke).

Share this:
Previous

Chongchit ka yaseiñ yalap ki khon khynroo ka Balang Catholic ha Barato Parish 

Next

Khut ka Hill’s Farmer Union ya ki warep ka West Jaiñtia Hills cha ka yalang paidbah ha Shillong