Jowai : Ka yakhun Final yong ka 5th Tiger Five Football Tournament ka wada pynman daka Sports & Youth Affairs, Chilliangraij, da pynkut yaka ynne ha Madan Chilliangraij heiwa u Deputy CEM ka JHADC u ma A.A. Shullai daw man u kongsan.
Ha kani ka yakhun yoh u rah yei naam da yachem ka Umshangiar SC waka Elsa SC.
Hachwa u sdang ka yakhun da em ka yalang tbian kawa da pyllai u Chairman Sports & Youth Affairs u ma C.W. Niangti, wei da yoh yaki kyntien makhane na u Secretary ka Sports & Youth Affairs u ma Oriland Shylla.
Hei klam kam u kongsan u ma Shullai da e yaroh u yaka Chilliangraij wada ye ko u pynman ya kani ka yakhun hadooh san sien kattu khlem pep.
Ka yalehke ynne ka sngi da man ko kawa yoosuk kawa yathaiñ bha heiwa pynar kiwa yalheke yong ki dhab da pynyoo ki yei sap wei bor yongki.
Ka Elsa SC da yoh chwa ko u pynkhih yaka jaar lyngba u Ebormi Buam Jersey No. 8, haka minit wa 23. Hadien ini kiwa kyrchaan yaka Umshangiar da kyr-iew ki ya kiwa yalehke yong ki yow yoh ki u thap iwa da ebor ya kiwa yalehke heiwa da yoh ki u thap kawi ka kool lyngba u Ede Jersey No. 12 ha ka 29 minit hachwa u kut ka kylla step.
Haka yaleh kylla miet won ka yakhun da man ko kawa yookynjai heiwa pyn ar ki dhab da man ki kiwa yatyngkhooh bor bha, heiwa da pyrchang ma pyrchang u pynkhih yaka jaar tangwa man ko kawa khor bha u ye u leh yeini wei hadooh wa kut ka kylla miet da man ko kawa khlem em wa ye u pynkhih yaka jaar.
Kamtæ da poi noh chaka chut tie breker heiwa ka Elsa da yoh ko 3 kool katwa ka Umshangiar da yoh ko du 1 kool donhi. Iwa da pynjop yaka Elsa SC ha kani ka Tiger Five yong uni u snem.
Yei naam Best Goalkeeper da yoh da u Teiboklang Laloo yong ka Elsa SC, i naam Top Scorer da yoh da u Brolington yong ka Elsa SC. Katwa u Ede yong ka Umshangiar da yoh u yein naam Best player.
Neiliang ka Sports and Youth Affairs lyngba u Wyrta e khubei kyrpang ko ya waroh ki dhab wa chim bynta ha kani ka lympung 5th Tiger Five. Yaki press ki media, kiwa chah khut sñiawbha, ki referee kamjooh ya waroh ki lok ki jor najan wa na jngai.
Discussion about this post