Jowai: Kamwa 500 tam ngut ki bru da yut ki na Harijan Colony, Iewmawlong wow lai yut rieh ki ha madan Garrison hei yada ki chipai ya ki, kiwa da pynbiang baam, pynbiang kymmor ya ki wow sah ki nadooh ka chi tarik ka janmiet uni u bnai.
Ki bru kiwa da yut hi da ong ki wa ym em kwah ki wow embynta ha ka awri awra wei ym em de sñiaw chngaaiñ ki wow sah ha yung ki.
U Lt. General DS Ahuja GOC 101 Area, da ong u wa ka sien wa khaddooh wa pynman Curfew ha Shillong toh ha u snem 2003 wei da khut yarap leh ya ki chipai (Army) wei ha kani ka kynti leh ha ka chi tarik leh da pynman ya ka Flag March heipor 3 waje nohchariñ ka sngi yow wanrah ya sñiaw chngaaiñ ya ki paidbah wei hadien da pyndam i khut yarap ka sorkar ha ka 2 tarik neidaw wa sñiaw ki wa da ye ki u wanrah yei suk i saiñ dei bor yong ki hi.
Heijooh i por leh da ong u wa lada man ka imlang sahlang kawa da suk tangwa hadooh ynnin ka 2 tarik leh ki bru dang wan psiah ki cha kani ka madan wei lada emkaam ka sorkar heiwon iwon i por ki chipai smat ki wow yarap.
Ka wi ka manbei kawa dang khian khon da ong ko wa da wan ko cheini i thaw neidaw wa tieñ ko ya jia iwa sñiawsih lada sah ko ha yung ko.
Uwi da ong u wa ym em de sñiaw chngaaiñ u sah ha yung wei da wan u cha kani ka thaw nadooh wa joor ka pakhot moo wa i pakhot bomb wei dang em leh ki khon u kiwa dang khian.
Ka wi ka manbei won da ong ko u wa ka ym sñiawthooh ko yi jia wei lada toh u paan maap yow wanrah yei suk u leh lada i bakla toh i yong ki.
Discussion about this post