Palat 1,800 ngut ki khynnah kynthai da yoh ki ya ka tika HPV Vaccination ha Meghalaya kam ka laad wow yada na i Cervical Cancer.
Hawa pyntip yeini ynne ka sngi, u NHM Mission Director, u Ramkumar da ong u wa ki kynthai wa da yoh ya kani ka tika man ko dang du 5% kattæ wei neiliang ka chnat daw lai pynman ko yei pynsñiawthooh paidbah cha ki skur yow sñiawthooh yeiwa emkaam ini i tika.
Kani ka e tika toh kawa da sdang ha u Thohlakhmi (Feb) uni u snem deiwa pynkrehkaam ka ha waroh ki 12 tylli ki District. Ini i HPV Vaccine toh iwa da e mynkna neibynta ki khynnah kynthai kiwa dadap 14 snem wei ki wym pu em dap 15 snem.
Ka Cervical Cancer toh kawa ar ka jait kjut Cancer wa boon dooh wa yoh ki kynthai hapoh ka jylla wei man ko 10% na ki Cancer wa chem ha ki kynthai hapoh ka jylla.
Ka chnat i chait i khiah da pyntip ko wa ini i e tika daw pteiñ ko hadooh u Kmaichonglad (Dec) 2026 ha ki thaw sumaar sorkar wa kynthup ha ki Primary Health Centre, ki Community Health Centre wa ki State Dispensary.
Ka sorkar da yaleh ko leh wow pynche lada em kiwa sñiawthooh bakla ya ini i tika deiwa kyntu leh ya ki bei ki pa ki khynnah wow lai yah ya ki khon khynthai ki kiwa da biang rta cha ki thaw sumaar wa em chajan wei kamjooh wow lai yachem wa ki ASHA lane ki ANM yow yoh ya ini i tika dei mynkna.
Discussion about this post