theme-sticky-logo-alt
theme-logo-alt
Advertisement ad1

Dang emkaam wow chong yalang sa chisien yow pynbait pood ha Ratacherra: Rymbui

U Montri wa toh u pait ya ka chnat kaam pohyung ka jylla u Lahkmen Rymbui, da ong u wa i daw wa slem wow ekti ya ka bui (Report) da ka Regional Committee kawa toh neibynta i kaam wow ya pynbait ya u pood u ang hapyrdi ka jylla Meghalaya wa ka Assam neibynta ki thaaiñ yong ka Ri-loom Jaiñtia khamtam ha ki bynta ka Ratacherra, toh neidaw wa ka Committee yong waroh ar tylli ki jylla dang dep ki chong dang ini wadep ya ka yalang ha nongbah Shillong wei toh lyngba kani ka yalang wa ki Committee yong waroh artylli ki jylla dang hap ki wow pait ya ki rai kiwa da shim na kani ka yalang.

Hawa yaklam wa ki laad pathai khubor, neiliang u Lahkmen da pynsñiaw u wa kani ka Committee ka dang pynkhreh ko wow ekti ya ka Report cha u Montri Rangbah ka jylla, tangwa hachwa wow ekti ya ka Report, kani ka Committee dang emkaam ko wow chong yachem biang sa chisien.

Kawi na ki phang wa rap pynslem ya kani ka Committee wow ekti noh ya ka Report cha ki Montri Rangbah toh wa hadien wa ka sorkar bei da dep ko wow pyntip wa daw pynbna ya kawi na ki khloo kam ka Sanctuary, iwa da jia ryngkhat wa katkam ka Map, kani ka thaw da kynthup lang won ya kawi na ki chong wa em hapoh ka Ratacherra, kawa lait na kani, u Lahkmen da ong u wa hei yongsakhiat ym em kawon kawon ka phang wow ye u ong wa daw em i ya kajia ya u pood u ang, tangwa iwa daw pynklumar yumut ya ka sorkar Meghalaya wa Assam.

U Lahkmen da pdiang u leh wa ha Ratacherra, kiwa boon na ki paidbah wa chnong toh ki Pnar, tangwa i kaam hi toh wa hap wow lai da ka luti wa jai jai yow lati yei ktah næ pynthut ya uwon uwon leh.

Share this:
Previous

Chrai ka Congress wym em khut ka sorkar MDA cha ka yasyllok ya u pood

Next

Lym e C&RD Block ya ka Narpuh daw Boycott ya ka Election: NBAJAC