Jowai: Kam u kongsan yong ka lympung wow phyllu yumut namo ka Seminar wa da pynman da ka Sngap Syiem College, Mawkyrwat ryngkat wei yakrehlang wa ka Khasi Authors’ Society kawa man ha ka 11 tarik uni u bnai, u Renikton Lyngdoh, MLA ka Mawkyrwat Constituency da ong u wa emkaam yei kyrchaan yong waroh kiwa chong chnong ka bri u Ynñiawtrep, wa kynthup ya u Khynriam, u Pnar, u Bhoi, u War. Da kyntu u leh ya ki seiñ kreh mon sñiawbha, ki seiñ niam, ki skur, ki College wei kyrpang dooh toh ki 36 ngut ki MLA wow ksohkti lang wa ka KAS ha i yaleh wow pynpsiah ya ka ktien Khasi ha ka bynta wa phra (Eight Schedule) ka Riti Synchaar (Constitution) ka ri India.
Ha kani ka lympung, da yoh leh i klam na u symbood kongsan u Hadrian Lyngdoh u MDC ka thaaiñ, uwa da kubur wa i por da ih bha i wa ka sorkar u chimkhia noh ko wow pynman kaam yei dawa ka KAS kawa da lai luti la 39 snem kattu. Kam u MDC da ong u wa daw syllok u wa u CEM ka KHADC wow kyntu ya ka sorkar jylla wow chim noh ya ka rai wow kyrpaad ya ka sorkar pyrdi wow pynpsiah noh ya ka ktien Khasi ha ka bynta wa phra khlem pynslem de.
U President ka KAS, u Dr. D.R.L. Nonglait da ban joor u wa ka sorkar jylla toh u rah noh ko wut wut ya ini i dawa cha ka sorkar pyrdi deiwa kdaw wa hadooh ki jait ktien kiwa da kynthup ha ka bynta wa phra em ki 22 tylli, ka ktien Khasi toh ha ka kyrdan wa 23 ha ka bynta wa phra ka Riti Synchaar ka ri India wei lada ka sorkar boohteiñ ko yeini daw pyntakha ko yei sñiaw ki paidbah ka Bri u Ynñiawtrep.
Kiwi kiwa da e i klam kynthup ki ya u Dr. S. Lamare, Dr. S.S. Khongkliam, Dr. K.D. Ramsiej u Andrias Sun wa u P.R. Kharshiing wa kiwi kiwi.
Da pynchongchit ya kani ka sngi da ki rwai na ki khynnah puræ kani ka College deilang i sakhi kiwa yahkhmat niam, ki seiñbhalang, kiwa synchaar chnong kiwa da chimbynta ka-it mynsien ha kani ka lympung.
Discussion about this post