U Chief Minister ka jylla, u Conrad K. Sangma ynne da ong u wa ka sorkar dang thooh ko ya ki luti wow pynlait ya kiwa sikai kiwa chah pynngat biah sia lieh ha i thung kreh ha u 2008-09 da ka chnat Puræ Puthi.
Da ong u wa ya ini i kaam dang puræ bniah da u Chief Secretary ka jylla heiwa da thooh ya ki luti wow leh yeiwa emkaam heiwa iwon iwon i rai wow chim ka sorkar toh katkam ka hukum ka kasari.
Ini i pynche u Conrad toh hadien wa ka High Court Meghalaya da pynksan ko ya ka Ampareen Lyngdoh wa u Director ka Education ha kitai ki snem, u JD Sangma hajrong kani ka mukotduma.
Da ong u wa kamwa 140 ngut kiwa sikai kiwa da pteiñ biang yei kreh hadien wa chem wym emkti ki ha i thung kreh pyrchah aiñ wei hadien wa phah pait biang ka yung bichaar da em biang kiwa da chah thung kreh wei kattæ lada em kiwa chah pynngat bakla, ka sorkar daw pynbait ko yeini deiwa paan bor na yung bichaar.
Kam wow kdaw heini, ka Hynniewtrep Youth Council da ujor ko cha u Chief Minister hajrong ka mynried kiwa sikai kiwa chah kynthup ha i kaam thung kreh pyrchah aiñ hadien wa da chah pynbaad nyngkong dooh ka Montri warim wa u Director ya kiwa da pynksan na ka kasari wym em chem yeiwa leh bakla.
Discussion about this post