Ynne ka sngi u montri rangbah ka jylla, u Conrad K. Sangma da ong u wa ka sorkar yaleh ko wow pynku ya i kaam rep hapoh ka jylla deiwa wanrah ya kiwa boon ki program wei ya ini da ong u heipor wa lai u cha ka Prime Hub wa em ha Songsak wow ap u sñiaw yei eh i khoo wa chem ki warep heipor wa ka sorkar yaleh ko u kreh neibynta ki paidbah ka jylla.
Ha kani ka sngi, ya u Conrad da synraan da u Govt Chief Whip u Marcuise Marak heiwa u Conrad da ong u wa ki Prime Hub toh kawi na ki kaam wa da leh ka sorkar wow yarap ya ki warep kamjooh leh kiwa seiñ khih seiñ kreh.
Da ong u leh wa ka sorkar katni dang pynkhreh ko wow sdang noh ya ki Prime Hub ha kylleiñ ka jylla.
Neiliang u montri rangbah da saam u leh ya ki Cheque cha ki seiñ Farmer Producers Groups kiwa kynthup ya ki bru wa em ha ki seiñ wow krehlang wow kyntu kynrong ya i kaam rep heiwa ki dkhot yoh ki T. 5000 samen.
Ki warep heipor wa yaklam ki wa u Conrad da ong ki wa dang emkaam ki chiboon i chah hikai iwa katkam ki stat ka juk wa katni heiwa neiliang yong oo leh da kular u wow chimkhia hajrong ini waroh.
Ha kani ka sngi da ekti leh ya ka syrnot cha kiwa pyndep ya i chah hikai wa le bnai hajrong i kaam mistri wa i kaam chna umkor ya iwa da pynman ha Bakdil Training Centre Walbakgre Tura, wei da pynlut poisa da ka Meghalaya Basin Development Agency.
