July 20, 2021

Sdang chem kse ki pulit ya kiwa tympdung bomb ha Khliehriat, la 4 ngut wa chah kem

by Wyrta Staff

Advertisement ad1

Ki pulit ka East Jaiñtia Hills District da dep kem ki ya ki 4 ngut ki bru kiwa kreh (Overground Worker) neibynta ka HNLC kiwa emkti ha i tympdung bomb IED ha Police Reserve, Khliehriat.

Ha ka miet wa tympdung bomb, ki pulit da chem kse ki hadien wa takit wa waroh kini kiwa chah pynbaad da ku ki da kawi ka kari wei da lai ki cha Police Reserve wow booh ya uni u bomb IED ha i miet synyaaw ka 13 wei ha i step synyaaw ka 14 tarik da tympdung ki ya uni u bomb iwa da tympiah ya i bynta i yung wei da mynsoo uwi u pulit.

Heijooh i por ki pulit da pyntip ki wa da kem ki ya ar ngut ki dkhot ka HNLC kiwa emkti wow pynhær ya ka lama yong ka ha u 2019 wei kiwa thmu wow tympdung bomb ya ka karkhana Coke ha thaaiñ Khliehriat.

Neiliang ki pulit dang takit ki wow chemdien ya kiwi ki dkhot ka seiñ kiwa emkti ha ini i kaam.

Puræ leh: Chah booh bomb ka karkhana Meghalaya Coke