U Montri wa pait yaka chnat Rymaw wa Khloo, u James K. Sangma da ong u wa ka sorkar da pyrkhat ko wow pynkieñ suloi ya ki Forest Guard yow yaleh pyrchah ya kitu kiwa pynyap ya ki mrad khloo.
“Daw ye ki wow leh rap bha yei kaam yong ki. Wei yeini i tyrwa dang ya pynbait katni,” da ong u James Sangma.
Katkam wa ong u Montri, heipor wa joor bha ki kaam ki seiñ kieñ suloi ha ri-loom Garo, kini ki seiñ da jooh psiah yabor ki cha ki Reserve Forest wei da knieh ki ya ki tiar yasiat kiwa da e cha ki Forest Guard.
Kamtæ da rai wow pyndam noh wow e tiar yasiat cha ki Forest Guard.
“Katni da tip i wa ka Meghalaya toh da chongsuk ko wei da pyrkhat biang i wow e tiar yasiat biang ya ki Forest Guard,” da ong u James.
U James da ong u wa ka chnat khloo da yoh yutip ko wa em ki mrad kiwa da yada da ka aiñ kiwa da chah rah tooh wei emkaam wow pyndooh ya ini.
