Shillong: Ki pulit ka nongbah Shillong dang pynman ki ya ka takit hajrong wa poor ka Result thok wa kam wa pynmih da ka Meghalaya Public Service Commission (MPSC) kawa da poi cha ki bru lyngba ka Social Media kam ha WhatsApp wa Facebook.
Hawa yaklam wa u SP (City) u SA Rynjah ynne ka sngi, da pyntip u wa hadooh katni ympu ye ki u ong iyi iyi leh neibhah ka takit dang lai ko chakhmat.
Da ong u wa ka tnat pulit rap chem chitom ko wow takit ya kam kini ki jait kaam neibhah uwa chna ya kani ka Result thok da pynpoor u ka lyngba ka WhatsApp wa Facebook, hanlada kattæ leh ka tnat pulit daw tih bniah ko ya kani ka kaam wei ym dooh kyrmen wow chem ya kiwa emkti.
Da pyntip u leh wa daw haap thoh cha ki tre kini ki Company neibynta kani ka kaam neibhah du ki donhi wa ye u chem ya ki bru wa emkti.
Katkam wa pyntip u SP, ya kani ka kaam da register Case katkam ka kyndon 66 (D) ka Information & Technology Act 2000, hadien wa da yoh ya ka ujor naka Secretary ka MPSC.
Ye wow pynkynmoo wa ynnin ka sngi, boon ki paidbah khamtam kitu kiwa yaleh ya ka exam kam neibynta ka kaam Junior Engineer ha ka tnat Veterinary, Water Resource Department wa P.W.D. (R&B) da kulmar ki hadien wa ka Result thok da em kiwa pynpoor ka ha ki Social Media.
Neidaw wa jia ini, neiliang ka MPSC da ujor FIR ko cha ki pulit pyrchah ya ki bru kiwa emkti ha kani ka kaam thok.
Discussion about this post