Jowai : U Sarok NH-44 nadooh na Mukhla hadooh ha Puriang ynnin u snem da mih khubor u neidaw wa kreh habra ka M/s Dhar Construction Company ya oo heiwa du hapoh 3 bnai da sih u heithaw u neh u 3 snem.
Da kreh ya uni u sarok ha i dor T. 9,66,91,395 (Khynde klur Yndru phawdru lak khyndephaw wi hajar le spah khyndephawsan tyngka). Hadien ini da mih i pyrchah na ki paidbah kamjooh leh na ki seiñ wa boon yow pynchitom ya kani ka company wa kreh ya uni u sarok wei wym hoi u pyllait poisa ya i kreh wa da dep ko lada ym chna pynmiat biang ya uni u sarok. Da em leh kiwa booh da ki RTI hei yatoh wa kani ka sarok.
I rukom kreh ya uni u sarok da poi i chadooh i chkoor ka Regional Office ka Ministry of Road Transport Govt. of India kawa em ha Guwahati wei da wan pait wan li sylli ya ka da u Pradip Lal, EE wei da ong u wa ym e sanction thymme ya kani ka company wei haap ko u pynlut da ka yong ka hi ka poisa yow chna ya uni u sarok.
Ha chwa u kut u snem 2015 da sdang chna biang ya i bynta uni u sarok nadooh u moomer 41 hadooh moomer 53 iwa man 12 kilometer, itæ toh nadooh Puriang hadooh Mukhla.
Tangwa hapoh 6 bnai hadien wa dep chna biang ya uni u sarok da chem wa nadooh na Mookyndur hadooh ha Riat Puriang da dap u sa du ki thlu kiwa heh wa kamjooh kiwa khian. Em ki bynta wa da sdang pyndap ya kini ki thlu tangwa yoo phylla wa hadien wa da dep chna tangdep ya uni u sarok yoosar kani ka kompany ympu em u yoh ko i sneiñ na iwa kreh khaler ko na ini wadep lada bichaar ya i sdang mih biang kini ki thlu ha uni u sarok.
Discussion about this post