Jowai : U Conrad Kongal Sangma yong ka National People’s Party (NPP) uwa man leh u khon yong u tynde u Purno A. Sangma da jop suk u ya ka Dikkanchi D. Shira yong ka Indian National Congress (INC) kawa man leh ka kurim u CM ka jylla Meghalaya u Mukul Sangma.
Ya kani ka Bye-Election cha ka 2-Tura (ST) Parliamentary Constituency da pynman yow pyndap ya ka chuki wa da eih da u (T) Purno Sangma.
Na ki 24 tylli ki legislative constituency wa em ha ri-loom Garo u Conrad da jop u na waroh lait noh na ka Ampati hiewa ka Dikkanchi da yoh ko 11,750 tylli ki vote katwa u Conrad da yoh u 9,318.
Ha waroh ki constituency u Conrad da yoh u 3,29,497 tylli ki vote katwa ka Dikkanchi yoh ko 1,37,283 tylli ki vote iwa pyntam u Conrad dei 1,92,214. Ka NOTA leh da yoh hadooh 16,597 ki bru wa jied u chon ha ka.
Ha kani ka sngi ya u Conrad da synran ya oo da ka bei u, ka diah u ka Agatha Sangma, ka kurim wa ki khon ki kti u wa kiwi kiwa ha yung ha sem yong oo.
Hadien wa pynbna wa da jop u ya ka 2-Tura u Conrad da lai nyngkong u cha i thaw wa tlep yow e burom ya u pa yong oo.
Discussion about this post