Ka Hynniewtrep Youth Council da kyntah joor ko yei rai yong ka sorkar Meghalaya wow pynkrehkaam bait ya ka Criminal Procedure Code (CrPC) wa ka Civil Procedure Code (CPC) ha waroh kawi ka jylla, kiwa waroh chi kattu ki wym jooh krehkaam ha ki thaw wa haap hapoh ki District Council.
U President ka HYC uwa man leh kam uwa yasaaid aiñ, u Robertjune Kharjahrin da ong u wa waroh chi kattu ki mukotduma wa ya tyngkhooh para jaitbru ri-loom, ka Kachari kawa embor wow bichaar toh ki Kachari yong ki District Council, lait noh kitu kiwa wa chah pynngat ha kiwi ki aiñ kiwa kyrpang lane wa rap khia, kam ka POCSO, NDPS wa kiwi kiwa emkaam ya ka bor wa rap hajrong wow bichaar.
Da ong u wa ini i thmu wow pynkup bor ka sorkar ya ki Kachari, da poi cha u pood kawa mut wow knieh noh yei bor yong ki Kachari ka District Council, neibhah wym pynemkaam bha ya ki kyntien ha i pynbna (Notification) wei da man ko leh khlem da sñiawthooh lane yasyllok wa ki ADC.
Da ong u leh wa hapoh ka District Council da em ki Kachari Chnong, Kachari Raij, Kachari Hima wa Kachari District Council wei lada pynkrehkaam ya ka CrPC wa CPC, ki Kachari Chnong wa ki Kachari Hima daw dooh noh ki neibhah ym em poisa ki wow su bai nongbichaar wa da pyndep ya ka LLB chaneiñ kiwa tip wow bichaar.
Da ong u leh wa ka Supreme Court ha ki kattu katni ki mukotduma da klam che wa ka CPC wa CrPC ha ki thaw ri-loom toh kawa daw ktah ya ki wei ym kwah wow pynkulmar ya ki paidbah da ki kyndon wa boon yong ka aiñ.
U Robert da ong u wa lada ka sorkar kwah ko wow e bor ya ki Kachari sorkar (District Court) da toh u chna da kiwi ki aiñ, kam ka Meghalaya Criminal Procedure Code wa ka Meghalaya Civil Procedure Code wei hawa chna ya kini toh u pait wa ki bor ka District Council Court wa ki Court tre ri wym chah ktah ki, lane lada pynkrehkaam leh ya ka CPC wa CrPC daw leh du ha ki District Court katwa ya ki Kachari Chnong, Raij, Hima wa ki Kachari District Council da toh u pynlait ya ki wei ya i bor yong ki District Council Court wow bichaar ya ki mukotduma hapyrdi para jait ri-loom ym toh wow knieh noh.
