U James PK Sangma uwa man leh kam u Montri ka sorkar jylla, heiyatoh wa i mih seiñ ki 12 ngut ki MLA na ka Congress cha ka AITC da ong u wa ka Politics toh ka kaam ka wym ye wow tip chwa wei ini iwa jia daw pynkylla i ya ka saiñ pyrthai ha ka jylla.
Da ong u wa ka AITC man ko kawa dang thymme bha ha ka jylla wei dang chimpor ya ka wow skem wow wandur ko ha ka jylla neibhah kamwa man ka NPP da chimpor ko boon snem hadooh wa poi ko ha kani ka kyrdan.
U James da ong u leh wa daw rap chitom ya ka AITC wow wandur ko ha ka jylla neibhah suk wow piah ka Party tangwa man won iwa eh wow lai yakhun Election wei wow khana pyntip ya ka thong krehkaam ka Party wei wow paan ya ka Vote na ki paidbah.
Hajrong ini i piah ka Congress wa i mih ka AITC wei heiyatoh wa i sñiaw ka NPP hajrong ka Election MLA ha u 2023, u James da ong u wa kam ka Party ym jooh pait ko yei por lada jan ka Election neibhah wa da jied ya ki da ki paidbah wei toh i kaamram yong ka wow pyndap yeiwa angnood ki paidbah. Da pynrap u deiwa ong wa ka Party da kreh ko khlem sangeh deiwa e nongmuna u wa ynne da wai ya ka yung krehkaam ka District Council Court kawa da chah ieh wei sahteiñ waroh chi kattu.
Chooh chooh da ong u wa ka NPP da kreh ko waroh chi kattu wei heipor Election ki paidbah daw bichaar ki yeiwa da kreh ko wei lada man kamwa angnood ki, kattæ ki leh daw jied biang ki ya ka wow wan biang hei bor.
