U Symbood Montri Rangbah ka jylla uwa pait leh ya ka chnat PWD (Roads), u Prestone Tynsong da ong u wa ka sorkar da booh ko yei pynrkhiñ wa ym chah wow lai ki kari kiwa khia na ka yingkieñ Umiam, wei da pyntip u wa ini da leh hadien wa da dep wow bichaar bniah yei long i man yong katai ka yingkieñ neibhah wa toh wa da rim ko wei da sdang wow tlot.
Da ong u wa ka sorkar wow yada nei pynkhia palat ya ka yingkieñ Umiam, da thooh laad leh wow chna da kiwi won ki luti, wei kawi na kini toh ka sarok Western Bypass, wei lada dep wow chna ya kani ka sarok daw yarap chiboon neibhah kiwa boon ki kari ym emkaam de ki wow lai pynkhia na ka yingkieñ Umiam.
Hawa kylli, u Prestone da pyntip u wa i kreh ya ka sarok Western Bypass na laad Mawmaram cha Mawlyndep dang sahkut ko neidaw wym pu yoh thaw, heiwa da phah ya ki Deputy Commissioner ka East Khasi Hills wa Ri-Bhoi District wow sdang noh wow pynyoh ya ki thaw.
