Shillong: Kiwa kreh kam ki Jugali da rai ki wow chong kyllaiñ myngngor hakhmat ka MeECL nadooh ka sngi 19 tarik lada ym yoh ki ya ka chithi thungkreh hadooh ka 18 tarik. Ya ini i rai da chim hadien i chong kyllaiñ myngngor ki wa ar sngi wow dawa noh ya ka chithi thung kreh ya ki hadien wa da pass ki ya ka exam wa pynman nadooh u 2011.
Ya ini i yakhih da kyrchaan da ka KHNAM Youth Wing hapoh i yahkhmat u President yong ka u Thomas Passah, heiwa ynne ka sngi da lai e dorkhat ki leh ha u Montri Rangbah ka jylla.
Hawa yaklam wa kiwa pathai khubor u Passah da ong u wa i por wow thung kreh ya ki Jugali u kut noh i ha ka 2 tarik uni bnai wow wei lada ym yoh ki ya kani ka chithi, i por yong ki u man i iwa sepai neibhah boon hi na ki man ki kiwa da palat i rta wei kiwa da em khon em kti.
Kini ki Jugali em ki kamwa 466 ngut kiwa da pyndep ya ka exam, wei da pynman yakhih ki deiwa kyllaiñ myngngor ryngkat wa ki placard ha i thaw yieñ kari ka Additional Secretariat wow dawa na ka Meghalaya Energy Corporation Limited (MeECL) wow e noh ya ka chithi thung kreh ya ki.
U Passah da ong u wa ha u bnai wa da dep da pynman ya ka yalang paidbah heiwa ka Meghalaya Energy Corporation Limited (MeECL) lyngba u secretary yong ka u Debojit Warjri da pyntikna u wow saam noh ya kani ka chithi cha kini ki Jugali tangwa hadooh katni ympu em u mih soh mih sla.
Yei thung kreh da ong wow leh ha ki bynta, wa nyngkong daw thung 336 ngut, katwa ka bynta wa ar wa kawa le wa kynthup ya 233 ngut.
Discussion about this post