Jowai: Ynne ka sngi kiwa kitkaam ka JTTA chirup wa ki sahep na ka chnat Taxation wa Market yong ka JHADC da lai sylli ki yei chna ya ka dukan V Mart kawa em ha Ladthadlaboh, Jowai.
Kam wow pynkynmoo heini ka JTTA da pyrchah ko yei e Trading Licence næ NOC ka Council ya kani ka dukan wa heh kawa dai sula wa kiwi kiwi deiwa chim ya ka rai ka Council ha u snem 2014.
Neiliang ka seiñ wa ki sahep ka JHADC hei sonteri ki pulit ka Jowai Police Station da yachem ki wa u tre ka yung wa em kani ka dukan wa kamjooh uwa pait ya ka (Franchisee), u Augustine Sungoh.
Hadien i yaklam, neiliang u President ka JTTA u I. Najiar da ong u wa u tre i yung u Augustine Sungoh da kam u wa i pynlut pynsep na oo, hun wei kmen ki lada ki tre jylla ye ki wow pynlai kat da kani ka yaaw wei ym emkaam hi ki ya ka Trading Licence, wei lada toh wa kam hi-eh u chong i hei mon yong oo.
Chooh chooh da ong u wa lada iwa sakhiat katkam wa kam u (Augustine) ka seiñ kyrpaad ko wow thung da ki tre jylla wot hadooh wow chong ha ki counter.
Ka seiñ da kam ko leh wa ka hi u yieñ skem bait ko katkam ka rai ka Council ha u 2014 wow sangeh u e Trading License cha ki baar jylla.
U Augustine da pyntip u wa ki dukan kani ka Company em ki ha kylleiñ ka ri, wei kani man ko kawa nyngkong dooh ha Meghalaya wei pyntip u wa daw thung kreh pyn da ki bru napoh Jowai wa ri-loom Jaiñtia hi ha kani ka dukan.
Neiliang u CEM ka JHADC, u MB Rymbai hawa yaklam wa kiwa pathai khubor ynne ka sngi ha kamra krehkaam yong oo da ong u wa hadien wa yoh NOC ki na ka Dorbar Chnong, ym man i iwa eh wow e ya ka Trading License cha kani ka Company neibhah nyngkong toh na i bor yong ka chnong.
Chooh chooh da ong u wa lada man i iwa emkaam daw rah u yeini hapoh ka Executive Committee chwa wow chim ya ka rai neibhah wa hadooh katni dang e du ya ka Trading License katwa ya ka NOC won ympu em e ya ka wei hadien wa chong ka EC lada ym yoobiang wot ya ka Trading Licence leh wow pyndooh, neibhah du ka NOC wa em ki kyndon ki aiñ, ym haka Trading Licence.
Discussion about this post