Ka Urban PHC kawa em ha Chutwakhu toh kawi na ki thaw sumaar ka sorkar ha Jowai kawa e chakri ya ki 15 tylli ki Dorbar Chnong wei hadooh kamwa 23,000 ngut ki bru.
Ha kini ki tayaw wa dadep da sdang i pynkhreh nadooh i ñiaam rong, i biah dur wa kiwi kiwi ki kaam ha ka thaw sumaar wa dang dep chna kawa em ha Loomkyrwiang, Jowai.
Hawa yaklam wa u DM&HO ka West Jaiñtia Hills, u Dr. KC Ajar da ong u wa kani ka yung kawa dang dep chna ha Loomkyrwiang katkam wa man kattæ ki kreh kiwa kynthup ya i ñiaam rong, i biah dur (Branding), i riñ bordiñ, ka um wa kiwi kiwi da man ki kiwa da pyndep lut.
Katkam wa man katni dang yang sa ya ka kot na ka Engineering Wing ka chnat wei hadien wa yoh ya ka chithi daw phah kot cha u DHS wow leh ki yeiwa emkaam.
Heiyatoh wa mynnu u kyrriah ya kani ka thaw na Chutwakhu cha ka yung thymme kawa em ha Loomkyrwiang, neiliang u Dr. Ajar da pyntip u wa yei por ymtip tangwa i rai chong i ha ka yung krehkaam u DHS.
Da pyntip u leh wa hadien wa kyrriah ya kani ka thaw sumaar na Chutwakhu cha Loomkyrwiang, kani ka thaw daw kreh ko ym du kam ka UPHC tangwa kam ka Health & Wellness Center leh kamjooh.
Ha kani ka thaw sumaar katkam wa man kattæ da em uwi u Doctor, Nurse, Pharmacist, Lab Technician wa Chowkidar.
