15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Ka yi ka ka Kamala Harris

Hadien ka Election jied President ka USA kawa yathaiñ bha hapyrdi u kyrtong ki Democrat u Joe Biden wa u kyrtong ki Republican u Donald Trump hanla ka niaw Vote dang pteiñ hi ko, kiwa boon ki laad pathai khubor ka America da pynbna ki ya u Biden kam u President wa thymme uwa 46 uwa da jop deiwa yoh ya 7.51 klur ki Vote paidbah katwa u Trump da yoh u 7.08 klur ki Vote paidbah heiwa ha America yow man President emkaam leh ya ka Electoral Vote yow jop heiwa da em emkaam 270 Electoral Vote yow jop heiwa u Biden da yoh u 290 katwa u Trump da yoh u 214.

U Trump heipor wa jop u yaka Hilary Clinton ha u 2016 da jop u daka Electoral Vote hanla ka Hilary Clinton da yoh ko boon ki Vote paidbah bar ya u Trump iwa man iwa phær bha i rukom pynman Election ha America.

Sa iwi iwa rap phær, ki kyrtong President hap jied lok (Running Mate) ki wow yaleh lang yaka Election ki wow man kam u/ka Vice President tangwa ya kini ym hap ki paidbah wow Vote yaki wei da joplang man jop u wa chah jied kam u President.

Ha kani ka kynti, ka Running Mate u Joe Biden toh ka Kamala Harris kawa daw man ka Vice President kawa nyngkong dooh ka America ka kynthai kamjooh ka doh yong, ka khon khleh jaitbru heiwa ka bei ko toh ka nong India katwa u pa ko toh uwa na Jamaica.

Ka Kamala leh man ko kam kawi kawa da yaleh wow chah jied yow kam ka kyrtong President ki Democrat tangwa da kynran dien noh ko.

U pa ka Kamala toh u Donald Harris katwa ka bei ko toh ka Shymala Gopalan kawa na Chennai kawa kreh kam ka Cancer Researcher wa kawa kreh monsñiawbha yow yaleh yei hok manbru.

Yaka Kamala da kha ha Oakland, California tangwa ka bei ko wa u pa ko da yalait noh ki heipor wa dang 5 snem ko wei da ri yaka da ka bei yong ka kawa man kam ka Hindu tangwa da heh ko kam ka jaitbru doh yong deiwa jied leh yaka dustur riti ki doh yong.

Haka kot wa thoh ko chaphang yong ka hi, da ong ko wa ka bei ko nadooh wa sdang sñiawthooh ko wa ri ko ya arngut ki khon kynthai doh yong heiwa ka bei ko leh da jied ko wow im kam ka doh yong neibhah sñiawthooh ko wa ha ri America yaki khon yong ka daw kheiñ yaki kam ki doh yong.

Ka Kamala leh toh kawa nyngkong ha kiwa boon ki jait kaam, jooh man ko kam ka County District Attorney, ka District Attorney ka San Francisco kawa nyngkong dooh ka kynthai wa man kam ka African-America kamjooh kawa em symbe na India wow ksoh ya kini ki kyrdan. Da man ko leh kawa nyngkong kawa chah jied kam kawa mihkhmat paidbah yaka California cha ka United States Senate deiwa man kam ka doh yong deilang ka Indian-American.

Yaka High School da pyndep ko na Canada heipor wa ka bei ko hikai ko haka McGill University, Montreal.

Yaka College da pyndep ko ha USA naka Howard University, hadien ini da pyndep ko yaka Law Degree na University of California.

Ka Kamala da bia ko ya u Douglas Emhoff uwa man kam u Lawyer wei da man ko leh kam ka beinah yaki arngut ki khon kynthai yong oo heiwa da pyntip ko wa da khut ki khon u yaka kam ka Momala.

Ya u kurim ko kattu daw tip leh kam u Second Gentleman katwa yaka kurim u Joe Biden daw tip leh kam ka First Lady.

Advertisement ad1
Share this:
Previous

Daw kyrriah noh ya ka UPHC na Chutwakhu cha Loomkyrwiang kam ka Health & Wellness Center

Next

Ieh noh u P. Phawa kam u Assistant Secretary ka JCMDA