Jowai: U Dolloi ka Elaka Jowai, u Puramon Kynjing, ynne ka sngi da pyntip u wa ka lehniam Behdieñkhlam ha uni u snem u man ko kawa lai bait wei deiwa bood ya ki kyndon ka sorkar, kam wow jngai iwi na iwi, i saitkti chwa wei hadien wa pyndep ya ka kaam niam wa kiwi kiwi.
Da ong u wa kam kani ka por ymtoh man ko iwa thymme, tangwa ki ma ki woh nachwa leh da maad ki kam ini iwa da jia nachwa wei ka lehniam Behdieñkhlam toh wow pyndep niam ya kitu kiwa da maad ya ka khlam wa dadep jia, wei waroh ki lehniam toh neibynta i chait i khiah ka chnong ka thaw, ka ri wa ka jaitbru.
Da ong u leh wa ym em dooh kyrmen ki wow em i ktah heiyatoh wow pyndep ya ka niam ka wa khroo dooh yong ka Chad Behdieñkhlam lyngba ki dak ki chin ha ki ar bynta yong ka lehniam wa da pyndep chwa ka Lockdown kiwa kynthup ya ka Thohlangdoh wa ka Chadthoh.
Chooh chooh da ong u wa da pyndep leh ya i Ngooh Blai wa kyrpang wei da pyrkhat wei daw pynlai ya waroh ki kaam niam khlem ktah won ya ki bor ka aiñ tangwa deiwa burom kylliang neibynta i bha.
Da kyntu u leh ya ki khon ka Raij wow em ki i kitkhlieh wow krehlang wa ki khlieh ka niam wa kynthup nadooh u Dolloi, Pator, Langdoh, ki Sangot, ki Chutia wa kiwi kiwi kiwa embynta wow pyndep ya ka niam.
Heijooh i por da ong u wa katkam ki dak ki chin da yoo wa daw ye u yaleh pyrchah ya kani ka khlam.
Katwa kamtæ da kyntu u leh ya kiwi ki khlieh synchaar niam wow ksohkti lang wei wow em i jooh i pyrkhat khlem em i sñiaw yaphær niam næ jaitbru, la ha sor næ palatsor, uwa stat næ duna i stat; næ la ha iwon iwon i rukom neibhah kam ha ini i por emkaam yei yakrehlang ryngklat wa ki bor ka sorkar wa ka aiñ neipor cheipor.
Da pyntip u leh wa ka Chaadniam Behdieñkhlam ka Raij Jowai u man ko ha ka 5,6,7 wa 8 tarik u Naiynñiaw uni u snem.
Discussion about this post