Shillong: U Additional Chief Secretary, Finance Department, Government of Meghalaya da pyntip u wa i man i long wa katni toh iwa ym jooh em chem neidaw u COVID-19 wei da pynbood won saka khang chnong namo ka Lockdown iwa daw ye u wanrah yei duna i yoh dan ka sorkar wa boon jait, heiwa ka dan wa da yoh ha uni u bnai da man ko kawa duna bha lada nujor wa uni u jooh u bnai ha u snem wa da dep wei i bhah dan wa yoh naka sorkar India leh yong uni u bnai da duna ko da T. 76 klur naka mang poisa wei ini daw ye i wow duna biang haki bnai wow wan.
U Additional Chief Secretary da pyntip u ynne ka sngi wa emkaam yaka jylla wow paitbniah bha ko yaka kaam poisa poilaiñ wei wow booh charood yaka poisa yow pynemkaam lada jia iyi iyi wa yatoh waka chait ka khiah lane ha iwon iwon i por wa emkaam jhan yow yoh yarap.
Kamtæ daw hap pynduna chipor 50% naka tulop (Gross Salary), yong u Chief Minister, Deputy Chief Minister, ki Minister, waroh ki India Services Officers kam ki IAS, IPS, IFS wa Central Services Officers kiwa phah kreh hapoh ka sorkar jylla.
Da pynduna leh chipor yaka tulop (Gross Salary) da 35% yong ki Group A wa B Officers wa 25% yong ki wakreh wa haap hapoh ka Group C Staff yong waroh ki chnat sorkar lait noh ki Officer wa ki wakreh ka chnat Departments of Health and Family Welfare wa ki wakreh wa haap hapoh ka Group C Employee yong ka Home (Police) wa Home (Civil Defence & Home Guards).
I pynduna tulop wada leh yaki wakreh wa haap hapoh Group A, B wa C u man ko i jooh cha kiwi ki thaw kreh wa yoh yaka Grant-in-aid, tulop naka sorkar jylla lait noh ya kitu ki wakreh Group C yong ki Municipal Board.
Ini i pynduna tulop yong ki wakreh sorkar toh neibynta u April, 2020 kawa daw su ha u May, 2020 wa ka yong u May, 2020 ka wow su ha u June, 2020.
Ym pynduna yaka tulop ki wakreh wa em hapoh ka Group D wa ya kiwa yoh Pension.
Ini i pyndun tulop toh du ha ini i por wei yaka tulop wa sah daw su manda sdang biang ka yaw ka haat u bha u miat.
Discussion about this post