U Montri Rangbah ka jylla, u Conrad Kongal Sangma da ong u wa ka National Thermal Power Corporation (NTPC) da mynjur ko wow e noh ya ka bordiñ (Power) wa ym em pynemkaam ka Meghalaya, neibhah waroh chi kattu ka jylla da hap ko wow su hi-eh ko cha ka NTPC nadooh wa da soi ya ka soskular ha u snem 2011.
Da ong u wa ka jylla man ko kawa embhah hadien wa kreh chitom wei yakhun ha ka kasari, ka NTPC da mynjur ko wow e noh ya ka bordiñ cha kiwi ki jylla. Katkam wa ong u Conrad, ka NTPC da e noh ko cha ka jylla Tamil Nadu hadooh 56 MW na ka 86 MW ka bhah yong ka Meghalaya.
U Conrad da ong u wa kamwa 70% ka Meghalaya ym emkaam de ko wow su neibynta ka bordiñ ka wym em pynemkaam.
Chooh chooh da ong u wa sa kamwa 25-30% kawa dang sah cha Meghalaya leh yooluti wow ye u e noh noh cha kiwi ki jylla, heiwa da ong u wa lada dep wow e noh cha kiwi ki jylla ya kawa sah leh, ka Meghalaya daw laitlooid noh ko wow su ya ka poisa cha ka NTPC kawa da kynjoh kamwa T. 4 klur.
Ha iwi i liang, hajrong i ekti ya ka bui da ka takit ya i rukom krehkaam ka chnat bordiñ, u Conrad da ong u wa ympu ye wow khana iwon iwon leh neibhah ympu yoh wow puræ ya kani ka bui wei daw chim ko sa kattu katni por.
