Daw em i Ksang Bnai iwa waroh uwi u Bnai namo ka Total Lunar Eclipse iwa daw jia ha ka 8 tarik uni u bnai iwa daw ye wow chynna na waroh kawi ka ri India nadooh i por wa mih u bnai. Tangwa i sdang wow chah tymmoh u bnai hei syrngu ka Pyrthai ym ye wow yoo na waroh kawi ka ri katwa i sdang kut daw chynna bha na ki bynta sepsngi ka ri heiwa kiwi ki bynta ka ri daw yoo ki manda sdang i syrngu ka pyrthai u wai biang yei dur u bnai namo i bynta wa kut kani ka Lunar Eclipse.
Ya kani ka Eclipse daw chynna leh na ki thaw wa em ha South America, North America, Australia, Asia, ka North Atlantic Ocean waka Pacific Ocean.
Kani ka Ksang Bnai daw sdang ko heipor 2:39 i sngi (IST) wei daw chah tymmoh lut u bnai heipor 3:46 i sngi iwa daw kut hadooh 5:12 i janmiet wei u chynna biang ya u bnai waroh uwi toh heipor 6:19 i miet.
Ki chnong wa em neiliang mihsngi kam ka Kolkata daw mih u bnai heipor 4:52 i janmiet wei i chah tymmooh lut u bnai u neh i hadooh 20 minit wei nadooh wa mih u bnai hadooh wa kut i Ksang Bnai daw man i 1 kynta 27 minit katwa ha Guwahati u bnai u mih u heipor 4:34, daw chah tymmoh lut u hadooh 38 minit wei nadooh wa mih u bnai hadooh wa kut i Ksang Bnai da chimpor 1 kynta 45 minit.
Ha Delhi ini waroh nadooh wa sdang hadooh wa kut chimpor i 50 minit, ha Mumbai 18 minit, ha Chennai 40 minit katwa ha Bengaluru 29 minit.
Ka Ksang Bnai wow bood wa daw chynna na India toh ha ka 28-10-23. Ka khaddooh ka Ksang Bnai wa chynna na India toh ha 19-11-21 kawa man kam ka Partial Eclipse namo ka wym em chah tymmoh lut u bnai waroh uwi.
Ka Lunar Eclipse toh kawa jia hawa chynna ya u Bnai waroh uwi namo ka Full Moon Day heiwa ka Pyrthai da em ko hapyrdi u Bnai waka Sngi wei ha ini i por da jia ka Total Lunar Eclipse heiwa u Bnai chah tymmoh lut u hei syrngu ka Pyrthai (Umbral Shadow) katwa ka Partial Lunar Eclipse da jia i heipor wa i syrngu ka Pyrthai da tymmoh i ya u Bnai dei kajiak donhi ym toh waroh uwi.