Ka yung krekaam yong u Divisional Forest Officer Social Forestry Division, Jaiñtia Hills, Forest & Environment Department waka Range Forest Officer, Social Forestry Range Shangpung ynne ka sngi da leh warom ki yaka sngi wa kyrpang ka ramaw namo ka World Environment Day ha Sawlyngdoh Higher Secondary School Mowkaiaw, deiwa chimbynta lang ka skur Sawlyngdoh kamjooh kiwi tawon ki skur wa marjan deilang kiwa sikai hajrong ka phang wa ong “Land Restoration, Stop Desertification and Drought Resilience”.
Ha ka yalang wa pynlai da u M. Suchiang, In-charge Social Forestry Range Shangpung da yoh i klam na u waheh chnong ka Mowkaiaw, u S. Lamare uwa da ban joor hajrong i emkaam wow sumaar ya ka ramaw ha kiwa boon ki bynta khnang yow yoh ya ka la’ær wa khooid, ka um wa khooid wei u chimkhia leh wow thung ya ki deiñ ki siej.
Khana haroh u wa kam ka chnong Mowkaiaw leh da yaleh ko u e yada ya ki dieñ ki khloo wa em hapoh ka chnong.
Heiyatoh wa i emkaam wow thung dieñ kyntu u ya waroh lang wow sdang na jar jiar i yung i sem deiwa thung syntu thung dieñ wei wow sumaar ya ki, neibhah wa i rukom man ka ramaw katni da phær bha ko, i daw toh wa da joor i pynjæd pynpra ki bru ya ka ramaw.
Kyntu u leh ya ki khynnah skur wow man kiwa minot kiwa kreh chitom wei wow rah leh ya ka khubor pynsñiawthooh cha ki paidbah hajrong wow yada ramaw.
Neitæ u N. Pariat, Retd. Asst. Professor hawa klam kam u bru chemphang ong u lada ym em itæ i bahkhlieh wow pynsñiawthooh hajrong i chah ktah ka ramaw, kamjooh leh u chim ki laad ki luti neibynta u e yada, daw poi ki por wa daw maad yei saja baam, saja um, saja la’ær wa kiwi tawon ki jait myntoi kiwa pynim ya u bru.
Tæ kamwa ka phang yong uni u snem ong ko “Land Restoration, Stop Desertification and Drought Resilience” kyntu u wow thung ya ki dieñ, u pynneh yei khyndaw u chyiap wym toh wow tih u khloh dusmon, neibhah manda joor ware i leh pynsih i ki bru, i khyndaw leh ym man de iwa hoi u rep u riang.
Neitæ kyntu u wow thooh ki laad ki luti yow pynneh pynsah ya ki um, u pynduna leh i pynemkaam Plastic wei wow man ki bru wa tip wa sñiawthooh kammon u pynlang u noh yei jhep.
Heijooh i por da pynkynmoo u ya ki aiñ waphær waphær wa da wanrah ka sorkar India neibynta u e yada ya ka ramaw, tangwa ki bru won ym em kheiñkor ki.
Ha kani ka sngi da sam leh ya ki Prize cha kiwa jop haka yakob thoh Essay wa Drawing kawa da pynman haka 3 tarik uni bnai, wei haka Drawing Painting da yoh nyngkong ka Idahun Dkhar naka skur Winter Adventist Higher Secondary School Mowkaiaw, wa ar ka Lana-ika Suchiang naka skur Mukhap Upper Primary School wa le won u Adamewan Shadap naka skur Government Upper Primary School Mowkaiaw.
Haka yakob thoh Essay da yoh nyngkong ka Graceful Dkhar naka skur Sawlyngdoh Higher Secondary School Mowkaiaw, wa ar ka Lanawanroi Lamare naka skur Winter Adventist Higher Secondary School Mowkaiaw, neitæ kiwa yoh wa le won em ki arngut wa kynthup ka Kynmow-idaka Shadap naka skur Govt. Upper Primary & RMSA Secondary School Mowkaiaw waka Jenita Pator naka skur Sawlyngdoh Higher Secondary School Mowkaiaw.
Da sam leh yaki Consolation Prize cha waroh kiwa chimbynta.
Hadien wa kut ka yalang da em leh i thung dieñ ha pchem ka skur Sawlyngdoh wa da chimbynta nadooh kiwa sikai ki khynnah skur wa kiwa chah khut sñiawbha.
Da em leh i chim smai namo i kular wow man ki bru wa maya ramaw dei wow em i kitkhlieh wow leh iyi re iyi neibynta ka ramaw.
Discussion about this post