Ka sorkar ynne ka 7 tarik da bichaar bniah biang ko yei long i man yong ka jylla na u COVID-19, khamtam hadien wa ku biang kiwa yabi ya u khñiang kjut ha kini ki kajiak sngi hapoh ka jylla.
U Symbood Montri Rangbah ka jylla, u Prestone Tynsong da pyntip u wa ka sorkar da rai ko wow pynmih chooh chooh ya ki kyndon wow pynrkhiñ u yada nei poor smat u khñiang kjut wei ynne i janmiet hi ka Chief Secretary daw pynmih ko yei pynbna.
Da ong u wa ini wa dep ka sorkar da rai ko wow phah pynyoo bait ya ki RT-PCR Test wa da leh hapoh 72 kynta manda poi ha ki khyrdop ya kiwa wan na baar ka jylla hanla da dep wow yoh tika waroh ar sien. Da ong u wa kiwa wan na baar toh u ya krehlang ki wa ka sorkar neibynta i bha i miat ki paidbah wa chong chnong ka jylla.
Chooh chooh da pyntip leh wa ka sorkar da rai ko wow pynjoor yei leh ya ki Test ya waroh kiwa chong chnong kiwa em ya ki dak ki chin, wei lada em ki dak ki chin wa chah ktah namo wa man Positive, thoh u chong kset bait hapoh ki yung ki sem neibynta 7 sngi katwa neibynta kitu ki wym em ya ki dak ki chin hap ki wow chong kset hadooh 5 sngi lada man Positive ki.
Da ong u wa ini i rai yong ka sorkar man ko katkam wa phah yong ka Ministry of Health and Family Welfare wa kamjooh na ka World Health Organisation (WHO).
Hawa yatoh wa i e tika, u Prestone da ong u wa ka sorkar ka kyntu joor ko ya waroh wow wan chim yei tika, da ong u wa em kiwa kylli ileh wow lai chim tika hawa kiwa da dep leh dang yoh ki ya u khñiang, u Prestone da jubab u deiwa ong u wa deiwa e tika, kiwa chah ktah daw lait ki nei chitom joor wei ym emkaam wow lai phah sumaar ha ki Hospital.
