Daw pynkup burom ka Tuber Kmaishnong ya u Ribait Phawa uwa yoh u paitlang wa u Modi ya i hiar Bnai u Chandrayaan-2

Jowai: Ka Dorbar Chnong Tuber Kmaishnong, East Jaintia Hills District, daw pynkup burom ko ya u Ribait Phawa ha ka 14 tarik uni u bnai heipor 10 waje i step ha Wah Chnong Cultural Club, neidaw wa jop u yaka ka Space Quiz na ka jylla Meghalaya wa pynman da ka Indian Space Research Organization (ISRO) deilang waka sorkar India, wei da chah jied u wow sakhi ya i hiar khyndaw u Chandrayaan-2 ha u Bnai deilang wa u PM Narendra Modi.

Ka chnong dap ko da i sñiawkmen wa i sñiawsarong ya u Ribait, kamtæ daw pynman ko ya kani ka yalang pynkup burom kam wow pynchlur ya kiwi ki khon ka chnong.

Ka chnong ka em ko i kyrmen wa u Ribait Phawa ha kawi ka sngi daw man u kam uwi u Scientist ka ri India.

U montri ka jylla u K. Shylla, I/C Disaster Management daw wan u kam u kongsan, wa u SP, East Jaiñtia Hills District, u V. Singh, IPS, u man u kam u symbood kongsan ha katai ka sngi, wei daw em leh chiboon ki bru rangbah ka thaaiñ wa ki khynnah skur daw sakhi lang ki ya kani ka sngi.