September 10, 2019

Pynman ka UYSSC yaka yakob yimpa wa nyngkong ha ka chnong Umlyngsha

Khliehriat: Ka Umlyngsha Youth Society And Sports Club (UYSSC), Elaka Lakadong, EJHD kam chibynta ka Youth Week Programme 2019 yong ki khon khynroo khyllood ka chnong, da sdang chwa da ka yakob yimpa (Swimming Competition 2019) ha ka Wah Sailynter kawa em ha chnong Umlyngsha.

Da pynman ya kani ka yakob ha ka 5 tarik uni u bnai kam chimbynta wow thooh ya ka sap ka phong yong ki khon khynroo yong ka chnong khamtam ha i liang yimpa um wei ha kani ka sngi da yawan chimbynta hadooh 10 ngut ha ki kyrdan waphær waphær.

Kamtæ ha ka kyrdan Sub-Junior da yoh rah nam jop wa nyngkong da u Lephimon Lamare, ha ka kyrdan wa ar da yoh rah da u Ebormi Lamare, ha ka kyrdan Junior da yoh nyngkong da u Heibormi Talang, wa ar da yoh u Shanbor Lamare, ha ka kyrdan Senior da yoh nyngkong da u Nidahun Lamare wei yei kyrdan wa ar da yoh u Dunishwa Lamare.

Ya kani ka yakob da wan sakhi da u Rimiyo Shylla uwa man uwa e buit yong ka East Jaintia Hills District Swimming Association (EJHDSA) kam u bru chemphang.

Ini toh katkam ka khubor kawa pyllait lyngba u W. Syrti, President ka UYSSC, EJHD.