U SP ka West Jaiñtia Hills u Bikram D Marak ynne ka sngi da pynbna u yei rukom pynlai kari wa thymme ha Jowai iwa daw pyrchang chipor deiwa pyrkhat wow pynsuk ya ki paidbah kamjooh yei chngaaiñ ki.
Ini toh iwa daw sdang nadooh ka 01-04-2021 hadooh 21-04-2021.
I rukom pynlai kari thymme man i kamni ha wah:
Daw booh yaka “No Entry” nadooh Laad Mission Hospital, Moosalyngkat hadooh Kynroohsaphlang Junction, Iawmusiang. Ka “NO Entry” kawa katni nadooh na Kynroohsaphang Junction hadooh Moosalyngkat daw pyndam noh ka wei daw chah u psiah ki kari neini.
Daw em leh ka “No Entry” na Iawmusiang Main Road yow lai cha Thomas Jones College. Ka “No Entry” kawa katni wa booh hawa wan na Thomas Jones College cha Iawmusiang Main Road dawa pyndam noh ka.
Kamtæ da kyntu ya waroh kiwa yah kari wow ya krehlang ki ha kini ki por yow lai bait i pynlai kari ha chnong Jowai.
