Jowai: Yow pynneh pynsah ya ka rymaw wow yada ya ki mrad khloo, neiliang ka Mutong Tourism Promotion and Environment Protection Society daw pynman ko yaka Tamasa kawa ar ya kawa tip kam ka Moopun Festival 2019 ha Kchaaid Moopun ha ka 27 tarik kawa man leh ka sngi lehkmen yaka World Tourism Day wa ha ka 28 tarik uni u bnai.
Ha kani ka Tamasa daw em boonjait ki yakob wei daw chimbynta da ki skur waphær waphær na East Jaiñtia Hills District nalor kiwi kiwi kiwa kynthup ya ka lai kjet da kiwa na Jaiñtia Eastern College, Khliehriat Higher Secondary School, Seiñ Jait Tuber Hr. Secondary School wa kiwi kiwi kiwa na Sutnga wa Rymbai.
U Deputy Commissioner ka East Jaintia Hills daw man u kam u kongsan wow wai, katwa u MLA wa man leh u Montri ka chnat Revenue u K. Shylla daw man u kam u kongsan neibynta wow pynhaap pyrda ya katai ka Tamasa.
Neiliang ka Mutong Tourism Promotion wa Environment Protection Society, da khut lang ko ya waroh cha katai ka Tamasa heiwa daw yoh phi u maad ya ki baam tynre wa ki jait dih wa da chet kyrpang.
Ha i jooh i por, ki bor chnong da pyntip ki wa kitu kiwa kwah wow wan dai baam cha katai ka thaw wa toh u yoh bor chwa ki na u waheh chnong katai ka chnong.
Ya kani ka tamasa da pynlai da ka Mutong Tourism Promotion wa Environment Protection Society, ka yung krehkaam u Deputy Commissioner EJH wa ka Tourism Promotion Society kawa man ka bynta yong ka Jaiñtia Eastern College deiwa kyrchaan ki bru samen wa ki seiñ ki kharkhana Cement Plant.
Discussion about this post