Jowai: Ka seiñ wa dang seiñ thymme kawa tip kam ka Jaintia Amalgamated and Redressal Forum (JARF) kawa kynthup ya ki seiñbhalang, ki warep, kiwa yah truck, kiwa mylla wa ki bru wa pawkhmat ka District nadooh ki MLA, MDC warim da khut ki yaka yalang paidbah neibynta wow yaklam hajrong i hiar ka yoh ka kot yong ki paidbah ka ri-loom Jaiñtia waroh kawi.
Ya kani ka yalang paidbah daw pynman ha ka 9 tarik uni u bnai ha madan yalehke ka chnong Tuber-Shohshrieh, EJH.
“Kani toh ka wyrta ka chula chaphi waroh ki khon ka ri Jaiñtia wow sñiawkhia yei hiar ka yoh ka kot ka kamai ka kajih ha kini ki san snem tam nadooh wa chah khang tih mooyong kawa da ktah ya waroh nadooh ki heh sphah kiwa em ki dukan hadooh kiwa mylla”, da ong ka khubor na u Chairman ka JARF u H. Phawa, MDC warim.
Da pynrap deiwa khut ya waroh ki paidbah kiwa chah ktah ha ka yoh ka kot lyngba i chah khang tih mooyong wow wan cha katai ka yalang.
“Hao ka yung bichaar wa em burom kawa ha khliehdooh, ka Supreme Court kawa da dep wow pyllait ya ka khang tih mooyong, tangwa hadooh katni i tih mooyong ym pu ye u sdang da ki paidbah lane ka tre paar, neidaw waroh ym pu sñiawthooh ki ya ka aiñ MMDR Act.
Ha kani ka yalang paidbah, daw em ki bru wa stat aiñ, kiwa yasaaid aiñ wa kiwi kiwi ki bru wa pawkhmat ka Jaiñtia Hills daw e ki yei pynche cha ki paidbah hajrong ka aiñ MMDR wei leh hajrong kiwi kiwi ki eh kiwa khroo hawa yatoh wa ka kamai kajih yong ki paidbah ka thaaiñ, da pyntip u Chairman kani ka Forum.
“Ya mih paidbah wow pynyoo wa i em i ka kitkhlieh neibynta ka ja kpoh ka yung ka sem yong i”, da pynkut uwa yahkhmat ka JARF.
Discussion about this post