15 49.0138 8.38624 1 0 4000 1 https://wyrta.com 300 0

Ha i yachem wa u BDO Wapung, chem ka MPUF wa u BDO hap u wow pait ya ar tylli ki Block

0 Comments
Advertisement ad1

Jowai: Ki dkhot yong ka Meghalaya People United Front (MPUF), East Jaiñtia Hills District, hadien wa ujor ki paidbah ka thaaiñ East Jaiñtia, hajrong i chem chitom yong ki wow yachem wa ki wakreh wei kamjooh ya u BDO yong ka Wapung C&RD Block kawa em ha Khliehriat. Neiliang ka seiñ ha i yahkhmat u Kyrshan Blah, President Khliehriat Circle, ha kani ka 06-11-2019, da lai ki wow yachem wa u BDO ka Wapung C&RD Block u Sanborn Marwein, yow thooh yutip na oo ya ini i eh yong ki paidbah.

Ha i yaklam wa u BDO u S. Marwein, da pynche u yaki eh yong oo neibhah kamwa man katni, hap u wow pait wei man u kam u BDO ya ki ar tylli ki C&RD Block, nalor ka Wapung wa hap u leh wow pait leh sa ka Saipung C&RD Block kawa ym em ya u BDO ka yong ka hi la kamwa 4-5 bnai katni, sa iwi leh u Marwein da ong u wa hap wow pait hadooh le soo tylli ki kaam hapoh ka ophis yong oo, kamtæ da chem chitom bha u. Da ong u leh wa heiyatoh wa ki wakreh yong kani ka ophis, katkam wa chem u, ki wakreh waphær waphær em bait ki hapoh ophis krehkaam yong ki, wei i wym yoh ki paidbah wow yachem wa ki, ye u man wa wan ki ha i por wa lai emkaam ki wei ki wakreh hapoh kani ka Block ki biang bait ki ong u Marwein.

Hawa yatoh wa i ksoh kaam yong oo kam u BDO ki ar tylli ki C&RD Block, neiliang u President ka seiñ da kyntu wei dawa joor u na ka sorkar jylla wa toh u booh ya u BDO ha ka Saipung C&RD Block, neibhah dei wym em BDO ha katai ka Block, kawa man kawi naki Block kawa heh wa kawa jngai, wei da pynjynjar wei pynchitom ya ki paidbah yong katai ka Block wei ktah ko leh ya ki paidbah yong ka Saipung C&RD, neibhah wa uni u sahep wa hap pait u ar tylli ki Block kawa ym ye u man, ong u President MPUF u Kyrshan Blah.

Chooh chooh u Blah, da ong u leh wa lada ka sorkar ym pynsmat ko wow booh BDO ha Saipung, neiliang ka seiñ deilang wa i kyrchaan ki paidbah daw lai bait ki cha khmat wow dawa wow pynbor ya ka sorkar wow booh ya u BDO ha ka Saipung Block, khnang wa ki paidbah u suk ki deiwa em ki jar jiar u BDO.

Advertisement ad1

0 Comments

Leave a Reply