Ka Seiñ Kyntu Seiñ Raij-12 Dolloi kamwa jooh pynman man-u-snem, ha uni u snem leh chirup dei ya krehlang wa ka Seiñ Raij Chnong Wapung Chnong, da wan pynsñiaw ki cha phi ki khon u Ynñiawtrep Ynñiawskum wa ka lympung wa 26 daw man ko ha ka 28 wa 29 tarik uni u bnai (Jan) 2023 ha ka chnong Wapung Chnong, East Jaiñtia Hills nadooh i por 10:00 waje i step.
Kamtæ da kani ka Wyrta, ka Seiñ Kyntu Seiñ Raij-12 Dolloi chirup wa ka Seiñ Raij Chnong Wapung Chnong da khut sñiawbha ko ya phi ki khon u Ynñiawtrep Ynñiawskum waroh wow ya pynlait por wow yawan cha katai ka lympung.
Ha kani ka lympung daw yoh phi ya ki chaad tynre wa ki sneiñ kyntu na ki waheh wasian wa kammon u leh i khnang yow ye u pynneh pynsah ya ka niam ka rukom wa ka dustur ka riti kawa i da yoh pateiñ i na u Blai Kynrad.
Ka seiñ da khut lang ko ya phi waroh wei heijooh i por leh u sñiawbha phi u khut ya ki para khon Niamtre na ki Seiñ Raij waphær waphær wow yawan cha kani ka Lympung wa 26 ka Seiñ Kyntu Seiñ Raij-12 Dolloi.
Da khut sñiawbha ya phi ki President, ki Secretary, ki Landgoh Niam wa ki Dolloi na ki chnat Seiñ Raij wa na ki Elaka waphær waphær deiwa yooluti wa dei ya wan yong phi daw pynman ko kani ka lympung kawa phooh wa phieñ wei kawa jop.
