Ka Sengkhihlang da pyntip ko cha phi ki khon ka Bri u Ynñiaw Trep Ynñiaw Skum wa daw pynman ya ka lympung yong ki khon khynroo khyllood ka Sengkhasi Seiñ Raij ha ka 16-04-2023 ha ka chong Kyrphei kawa haap hapoh ka Seng Khasi Tyrsad Circle.
Ya kani ka lympung daw sdang nadooh ka 14 tarik, kamtæ ka sengkhihlang da khut da wer ko ya phi ki khon ka Bri u Ynñiaw Trep Ynñiaw Skum wow sñiawbha phi wow yawan cha kani ka lympung khnang wow yoh phi chiboon ki kyntien sneiñ kyntien kroo wa ka ngooh ka dem na ki waheh wasian, na kiwa yahkhmat niam kam ki Dolloi wa ki Syiem.
Ya kani ka lympung ym em yoh u pynman ha kini ki ar snem neidaw wa wan ka khlam COVID-19.
Ya u moopynyieñ sah naam yong kani ka Lympung wa 33 ka Sengkhihlang daw wan rah na ka Seiñ Raij Narwan, East Jaiñtia Hills District cha ka chnong Kyrphei ha East Khasi Hills District uwa daw kit nadooh kani ka 14 tarik nadooh 7:00 waje i step na ka chnong Narwan wei daw lai luti lyngba kini ki chnong nadooh na Tuber, Muthlong (Phramer), Ialong, Jowai, Mukhla kiwa haap hapoh Ri-loom Jaintia wei nadooh ka chnong Mawryngkneng, Ladsmit, Marbisu, Mawngap, Mawphlang kiwa haap hapoh Ri-loom Khasi. Kamtæ kini ki chnong daw pdiang sñiawbha ki ya uni u moo sahnaam ha man kini ki chnong wa lai luti u da ka ngooh ka dem ka duwai ka phirat wa 10 minit kawi kawi ka chnong.
Kamtæ da kyrpaad ya ki khon khynroo ka Seng Khasi, ki Seiñ Raij wow sñiawbha u lai deiwa em akor heipor wa bood ya u moo pynyieñ ym toh wow leh jhan namo wow toor jhan tangwa wow lai dei ryntih khnang wow lait na iwon iwon i jia wa sñiawsih wei wow lait nei sahkut kari ha luti ha syngkieñ.
