Ka Seiñ Kyntu Seiñ Raij-12 Daloi kamwa jooh pynman man-u-snem, ha uni u snem leh chirrup deiwa krehlang wa ka Seiñ Raij ka chnong Mupyut da wan pynsñiaw ki ha phi ki khon u Ynñiawtrep Ynñiawskum wa ka Lympung wa 25 ka Seiñ Kyntu Seiñ Raij 12-Daloi daw man ko ha ka 29 wa 30 tarik uni u bnai (January) 2022, ha ka chnong Mupyut West Jaiñtia Hills, Elaka Jowai nadooh i por 10:00 waje i step.
Kamtæ da kani ka wyrta, ka Seiñ Kyntu Seiñ Raij-12 Daloi chirup wa ka Seiñ Raij chnong Mupyut da khut sñiawbha ko ya phi ki khon Ynñiawtrep Ynñiawskum waroh wow ya pynlait por wow yawan cha katai ka Lympung.
Ya kani ka Lympung daw pynman ya ka ha chnong Mupyut hadien wada yoh bor na ki bor District lyngba u Deputy Commissioner ka West Jaiñtia Hills District.
Da kyntu ya ki chnat Seiñ Raij waphær waphær wow ya krehlang phi chirrup wa ka SKSR 12-Daloi deiwa phah phi ya kiwa chimbynta wa ki paidbah wow wan cha kani ka Lympung du ya ki khynroo wa ki waheh. Ya ki khynnah wa 10 snem chapoh wei kamjooh ya ki wada heh bru kiwa da dap 65 snem chaneiñ ym chah ya ki wow wan ki cha kani ka lympung, wei kamjooh ya ki paidbah wa wan cha ka lympung hap wow sylli (Screening) chwa wow psiah ki chapoh ka madan lympung wei hap ki u chong jngai uwi ya uwi kamwa 6 phut.
Ym chah leh u mynthu pathi hapoh u pood yong ka madan lympung wei wow dih biri, duma leh.
Kiwa wan cha ka lympung hap ki wow sait bha ya ki kti da i sabon waka um ha ki thaw wada pynkhreh chwa wei hap leh wow rahlang wa ki Hand Sanitizers.
Kiwa wan cha ka lympung ym hoi u ya e khublei kti uwi ya uwi. Ya ki paidbah wa wan cha ka lympung, ka seiñ daw chim ko ya i pyrtuid, thaw sah wa i Phone Number yong ki hachwa wow psiah ki chapoh ka madan lympung.
Ha kani ka lympung daw yoh ya chiboon ki ktien sneiñ na ki waheh ki chnat Seiñ Raij waphær waphær wei kamjooh leh daw yoh ya ki chaad tynre na ki khon ki Seiñ Raij waphær waphær napoh ka ri-loom 12 Dolloi.
Yow poi cha ka chnong Mupyut toh deiwa lai na u sarok Jowai-Dawki wei jngai ko na Jowai kamwa 20.2 Km.
Kani man ko katkam wada pynlait khubor da u S. Sari uwa man uwa e buit ya ka Seiñ Kyntu Seiñ Raij 12-Daloi.
