U mot sahnaam yong ki khlawait ka ri na ka jylla Meghalaya, U Tirot Sing Syiem, U Kiang Nangbah wa u Pa Togan N Sangma daw pynkylla dur oo deiwa booh da ki motdur wa chi rynyieñ yong kini ki khlawait ha uni u mot ledong wa em ha pchem ka State Central Library.
Da sdang wow lai pait ya ini da u Sanbor Shullai, Montri ka chnat Arts & Culture hei emlang ki heh kani ka chnat nadooh u Frederick R Kharkongor, Commissioner & Secretary, Arts and Culture waka WAM Booth, Director, Arts and Culture wa u Raphael Warjri kam uwa tah dur.
Neiliang u Sanbor Shullai da khana u wa da em ki kattu katni ki seiñbhalang kiwa da e yumut wow chna da ki motdur wa ye u chynna, kiwa phooh wa phieñ yong ki khlawait ka ri kamwa dadep chna ya ki motdur yong ki bru khroo ka ri India, ka Indira Gandhi wa u Netaji Subhash Chandra Bose. Wei kini u man ki kam ka nongmuna wow pynchlur wei wow e mynsien ya ki khynroo khyllood ha kani ka aiom lehkmen ya ka lyngkhooh snem wa 50 yong ka jylla wa ka lyngkhooh snem wa 75 snem yong ka ri India.
U Sanbor Shullai da pynbna u leh wa daw ekti ya ini i kaam wa kynsai ha u Raphael Warjri wow tah ya ki durkhmat lyngba ka Riti Academy, wei i lut ha i bhah wa nyngkong toh hei dor wa T. 30 lak heiwa ka sorkar daw pynbiang ko ya ka bhah wa dang sah hadooh wa dep pura. Wei da yooluti wow pyndep ya ini waroh hapoh le bnai.
