Kawi na ki phlim wa dang dep pynmih thymme napoh Ri-loom Jaiñtia kawa tip kam ka NUKSA, hadien wa dep u pynyoo nyngkong ka ha u Naikhynde ha chnong Ummulong. Da yoh leh wow lai pynyoo ka ha u Naichiphaw ha ki 7 tylli ki chnong kitæ ha Moodymmai, Ialong, Lumchyrmit, Lyngkyrdem, Mukha Ialong, Pynursla wa ha ka chnong Rangad.
Kattu won u wan pynyoo ka ha chnong Jowai haka 17 wa 18 tarik uni u bnai (Dec), 2023 ha Yungwalieh yong ka Dorbar Chnong Loomiongkjam, Jowai.
Ha ka 17 tarik u pynyoo heipor 12:00 waje pyrdi sngi wa heipor 7:00 waje i miet. Ha ka 18 tarik won i por wow pynyoo ya kani ka phlim toh 1:00 waje i sngi, 5:00 waje i janmiet wa heipor 7:00 waje i miet.
Kamtæ neiliang uwa chna ya kani ka phlim deiwa burom ya ki lok ki jor yong ka chnong Jowai, da kyrpaad u wow e kyrchaan phi deiwa wan sakhi phi ya kani ka phlim wei i dor Ticker man i Rs. 150 ya ki waheh, Rs 50 ya ki khynnah khian. Katwa ha Balcony i dor man i Rs. 200 ya ki waheh wei Rs. 100 ya ki khynnah.
Ha kini ki sngi daw emlang leh uwa ak kamjooh uwa chna namo u Director, u Rimi Shylla uwa na Ummulong waka Actress, ka Prery Rose Lakiang kawa chnong wa sah ha Tpep Pale, Jowai deilang wa kiwi tawon kiwa ak wa da embynta ha kani ka phlim.
Neiliang uwa chna ya kani ka phlim, da ong u wa ya kani ka phlim da thrang u chna nadooh u snem wa da dep u ak ya ka phlim Da Thehlut-2. Wei ha kani ka phlim NUKSA da kwah chooh chooh u pynwan dur wei wow pynmiat chooh chooh bar ya kiwi ki phlim kiwa da jooh ak u nachwa deiwa yarap lang ki paralok Actor wa da jooh ya embynta lang wa oo haki snem kam u Dameyoki Dkhar (Actor) uwa man leh kam u Assistant Director ha kani ka phlim, u Goldbertstar Lakiang, u Herman Khonglah wa u Pynsakhiatyeini Kyndiah kiwa da ak ha kiwa boontylli ki phlim Pnar ryngkat wa u Meban Langstang uwa da embynta ha kiwa boon bha ki phlim Pnar ha ki snem wa dadep kam u Cameraman/Editor.
Chooh chooh neiliang u Rimi da e burom u leh ya u Ram Suchiang, deiwa ong u khlem u Ram Suchiang kani ka phlim ym man ko kawa mihsoh. Ong u wa chiboon i eh heipor wa sdang u pynbiang pyntoh wow sdang ya kani ka phlim, wei neiliang u Ram Suchiang kam uwa rwai wa chna ya ki sur ha kiwa boon ki phlim, da e u ya ki buit ki budia wei da e mynsien u ya oo leh wow chna ya kani ka phlim kawa da thrang u nadooh nachwa.
U Rimi da ong u leh wa da e laad ya kiwa boon ngut bha ki Actor wa thymme ha kani ka phlim kiwa na ka chnong Iooksi kam u Prosperity Sutnga, u Lander Sutnga, u Lewat Tangliang, u Kamwadamut Paslein, u Yomanly Shadap wa u Saibok Tyngkan neitæ u Rikima Phyllei na chnong Mootyrchiah, u Drias Bang naka chnong Mustem, u Rimiki Chullet na ka chnong Shangpung, u Dapmain Suchiang, u Theij Heibormi naka chnong Raliang wa kiwi tawon kiwa na ka chnong Samhain, Ummulong, Moodymmai, Nongstoin wa na Shillong.
Da e khublei chooh chooh u ya kiwa boon ki paralok kiwa yarap u yaleh wow thooh laad hei wow pynyoo ya kani ka phlim ha kiwi tawan ki chnong wa chakhmat. Da e khublei leh ya kiwi tawon ki YouTube Channel kiwa da yarap u pynpoor ya ka Teaser waka Trailer yong kani ka phlim.
Hadien wa da dep pynyoo ya kani ka phlim kattu ha ki 8 tylli ki chnong, da e khublei u leh ya kiwa pynlai chnong wa da e laad wei chah ki u pynyoo ya kani ka phlim ha chnong yong ki, deiwa ong wa i lehbha wei i yarap kini ki chnong man i iwa kordor bha ya kiwa chna phlim yong i neibha i wym pu ye u pynyoo phlim kam kiwi tawon ki jaitbru cha ki Netflix, Amazon Prime wa kiwi kiwi wei hap du wow chaniah ha ki para jaitbru yong i donhi.
U Rimi da e khublei u ya ki 4732 ngut kiwa da dep thied ya ka Ticket yong kani ka phlim deiwa ong, “I thied yong phi ya ki Ticket yong kani ka phlim da man ko kawa yarap wei e mynsien ya nga wow pynmih chooh chooh ya ki phlim kiwa rap yoosuk ha ki snem wa daw wan.”
Mula mala chaphang kani ka phlim kamjooh ki thaw wa da dep lai pynyoo ka, ye phi u pait heini i Video ha wah.
Discussion about this post